[dropcap]В[/dropcap]ай гьантрай Р. ХIамзатовлул цIанийсса Национал библиотекалуву хьунни поэзиялул мажлис – Бахттун Гъазиевал «Зунттайхсса ссурулккуртта» тIисса луттирал презентация.

Ши­кку гьуртту хьунни шаэртал, учительтал, библиотекалул зузалт, дуклаки оьрчIру.

А. Аьбдуллаева
Мажлис бачин бувну ия Да­гъусттаннал халкьуннал шаэр Мирза Давыдов.
— Шаэр – миллатрал лажинни, миллатрал дардгу, къювугу, ххари-хъиншивугу цала дакIниву ларсун заназисса инсанни.
Шаэрнал цIа тачIав духкъалагайссар аьрщарай, — увкунни ванал, мажлис тIитIлай. Бувсунни Бахттун Гъазиевал оьрмулия ва творчествалия.
Бувну бур Бахттун 1948 шинал ноябрь зурул 12-нний ЧукIуннал шяраву. 1965-ку шинал Ккурккуллал школагу къуртал бувну, зун бивкIун бур ЧукIуннал колхозраву. Шаэр хIисаврай ванил цIа махъсса шиннардий кIул хьурчагу, шеърирду ванил жагьилнийва чичайсса бивкIун бур. Цалчин­сса шеърирду чивчуну бур 18 шинаву. Мигу чIявуми колхозрал зузалтрал, хIухчалтрал, хъузалтрал захIматрал кьадру чIалачIи буллалисса бивкIун бур. Ванил шеърирду бувккун бур «Дусшиву» альманахрай, «Ххяххабаргъ», «ЦIусса ххуллу» районнал кказитирттай. Уттинин бувккун бур Бахттуннул арулва жуж.

«Зунттайхсса ссурулккуртта» тIисса жужравун бавтIун бур авторнал язи-язими шеърирду.
Шаэрнал творчествалия бусласисса ихтилатру ялагу бунни «ЦIубарз» журналданул редактор Хизри Ильясовлул, философиялул элмурдал кандидат Аьвдуссалан Магьдиевлул, Аьбдулкьадир НякIучиевлул, Сажид Камиловлул, шяравучу ХIаммада Маршаевлул, лакку мазрал учительница ПатIимат Аьлиевал ва м.ц. Бах­ттуннул шеърирду бувккунни дуклаки оьрчIал.
Мажлис чIюлу бунни Халисат Батырбековал, Ульзанал, Рамил КьурбанмахIаммадовлул, Карина Далиевал балайрдал.
Ахирданий цила кьини хъун дан бувкIминнахь барчаллагь увкунни Бахттуннул.