Ккаллину бур Ккурккуллал музей

Ккаллину бур Ккурккуллал музей

Хъунмасса Буттал кIанттул цIанийсса дяъвилий Ххувшаву ларсун 75 шин шаврицIун бавхIуну, жула республикалий дуссия Аьралуннал ва захIматрал савлугърал музейрдал дянив­сса конкурс.

А. Аьбдуллаева
Конкурсрай Дагъусттаннал школардал музейрдаву цалчин­сса кIану бувгьунни Ккурккуллал школалул музейрал. Ванил гьану бивзма ва директор хъанахъиссар чIявучин кIулсса ва бусравсса шаэр, педагог Даниял Магьдиев.

Даниял дакIнихтуну барчагу увну, ванан хIурматрал грамота дуллунни Дагъусттаннал Ветерантурал советрал председательнал хъиривчу Каримуллагь Мавраевлул.
Ккурккуллал школалул музей, буниялагу, лавайсса кьиматран лайкьссар. Шиву ду­ссар чIярусса шиннардий салкьи дуллай бивкIсса 1200 экспонат.

Музейрал хъаттиралу дуклаки оьрчIал ва хъуниминнал дуллалиссар хъуннасса агьамшиву дусса ахттаршиннарду, хъиривлаявуртту. ХIакьинусса заманнай, оьрчIру ватан ххирану тарбия баврил даву гьар кIанай хьхьара хьусса чIумал, укунсса музейрдахь хъунмасса иш бу­ссар оьрчIаву му ччаву ххишала хьун дан, ми цала цIанихсса тарихращал ва жула вирттавращал кIул бан.

Музейран лайкь бувсса хьхьичIунсса кIанугу барча тIий, барчаллагь тIий буру Даниял Магьдиевлухь чIярусса шиннардий ва бигьа дакъасса даву дуллай ушиврийн бувну.

Читайте также: