ЦIусса шинал байрандалул гьантрай жулва лакку душ (Ваччи-Шахьуйми) РахIима Сулаймановал каялувшиндарайсса Каспийскалиясса «Салам» ансамбльданул оьрчIру

лавгунни Москавлив – билаятрал яла хъунмамунин ва яла агьаммунин ккаллисса Кремлилул Елкалийн.

Бадрижамал Аьлиева
Дагъусттаннаясса коллектив Москавлив билаятрал Хъунмур Ёлкалийн тIайла бувккунни ДР-лул КIулшиву дулаврил ва элмулул министерствалул.

— Хъун Елкалул шадлугъир­ттал программа хъинну авадан­сса дия. Миккун оьрмулуву цалчин багьсса оьрчIал дакIру яргсса асардал видурцIуну дия. Москавлив гьан дурсса гьарцагу кьини гамуниха къалархьхьу­сса, цIу-цIусса кIанттурдайнсса аьрххирдал, цIу-цIусса асардал дурцIусса дия. ОьрчIру бив­ссар Москвариумравун, Цветной бульварданийсса Никулиннул циркиравун, «Ледовое» шоулийн ва чIявусса цаймигу кIанттурдайн, — буслай бур РахIима Сулайманова.
Москавлив чIава къав­тIалтрал «Россия» каналдану­хьхьун интервьюгу дуллу­ссар. Му каналданул журналистътал жулва оьрчIахь цIухлай бивкIун бур цумур региондалия бувкIссарив, Елкалий ци къавтIаву ккаккан дурссарив, къавтIалтрал костюмирттая, ансамбльданул репертуардануву­сса къавтIавурттая, музыкалия.

Укун ххарисса асардал, гихунмай хъиннува ххуйну дук­лансса ва къавтIунсса гьава­с­ращал, Аьрасатнал Федерациялул Президентнал Иширттал управлениялул щалагу Аьра­сатнал ЦIушинал Ёлкалийн­сса хIадуршиндаралсса бувай­сса штабрал ва Профсоюзир­ттал Москавуллал федерациялул чулухасса Барчаллагьрал чагъарданущал зана хьунни оьрчIру Дагъусттаннайн.