Буслай бур Рисалалул хIакъиравусса цалвами пикрирду

Буслай бур Рисалалул хIакъиравусса цалвами пикрирду

ХIажи Султанов, ДР-лул экономикалул министр:
-Билаятрал Президентнал бувсун бур инсантурал доходру гьарза дувансса чараннал хIакъираву. МуничIансса ца шану хъанай бур инвестициярттал цIусса цикл щурущи баву.

ЛичIинурасса къулагъас Рисалалий дурну дур демографиялул масъаларттах ва кулпатирттан кумаг баврих, ясли-садирттай оьрчI-бакIуннан кIанттурду дузал баврих, дуклаки оьрчIансса кIанттурду щаллу баврих. Ми давурттансса арцурдугу итадаркьуну дур.

Камил Давдиев, ДР-лул Халкьуннал Мажлисрал депутат:
— Рисалалий диялсса къулагъас дурну дур национал проектру бартдигьаврих.
Президентнал бувсун бур жагьилсса ва чIявусса оьрчI-бакI бусса кулпатирттал захIмат­шивурттая, миннан кумаг буллан аьркиншиврия.
Цуксса хIайпнугу, махъсса ппурттуву демографиялул захIматшиву хьуну дур Дагъус­ттаннайгу, оьрчIру баврил коэффициент бур 1,6. Му масъала дузал бувансса кумагну хъанай бур ниттил капитал. Му программа щурун тIий дур 2026 шинал ахирданийннин. Утти дуллантIий дур цалчинмур оьрчI бувну махъ 466 азарда къуруш, кIива оьрчI бусса кулпатрал ласавантIий дур 616 азарда къуруш.

Миннуяр ххишалану Рисалалий бур гьашину январьданул 1-нния тIайла хьуну 3 шинавусса оьрчIан 7 шинавун биянцIа гьар зурухсса хIакь булаван ккаккан бувну, агарда ми кулпатирттал дучIия ца инсаннал яшаврил минимумраяр ххишаласса да­къахьурча.
Аьрасатнал Президентнал бувсун бур мукунма дуккаврил, цIуллушиву дуруччаврил ва цаймигу арардаву дуллан аьркинсса давурттая.

Камил Сяидов, ДР-лул жагьилтурал иширттал министр:
-Хъунмасса кумагну жагьил­сса кулпатирттан хъанахъиссар Рисалалий ккаккан дурсса ни­ттил капитал лахъ даву ва 7 шинавун бияннин оьрчI-бакIуннин арцу дулаву.
Мукунна хъинсса сиптану хъанай дур вузирдаву бюджетрал кIанттурду гьарза баву. Дагъусттаннан му хъинну агьамсса зат­ри.
Му бакъассагу, Владимир Путиннул хъунмасса кьимат бивщунни волонтертурал ккурандалул давурттангу, хаснура «Волонтеры Победы» тIисса Аьрасатнал сакиншиндаран. Мунил филиал буссар Дагъус­ттаннайгу.

Зарема Буттаева, ДР-лул культуралул министр:
-Президентнал баян бунни «Культура» тIисса нацпроектрал лагрулий итадаркьуну душиву 8 млрд. къурушрал, оьрчIал магьирлугърал школарттан аьркин-къарцин ласуншиврул. Путин лаивзунни Аьрасатнал субъектирттал хIукуматирттайнгу, оьрчIал магьирлугърал школартту, бакьингу бувну, низамрайн буцин кумаг бувара тIий. Му миннал буржгу бухьувкун. ХIакьинусса кьини республикалий бур 86 художествалул ва музыкалул школа. Миннувату 44 школа аьркинни гьануцIакул бакьин буван (капремонт), 4 школа бур лекьан бю­хъайсса тагьарданий.

Читайте также: