[dropcap]Я[/dropcap]нварьданул 3-нний ДР-лул ХIукуматрал Председатель Артем Здунов МахIачкъалаллал кучардавух увккунни, ЦIушинал байрандалул гьантрай коммунал ххиличIрурду дукьан даврил тагьар кIул даву мурадрай.

КIулсса куццуй, ларгмур шинал январьданул 1-нния махъ Дагъусттаннай щурун диркIссар ххиличIрурду дукьаврил система. Цукунсса дахханашиву хьуссар му программа ишла дуллай шин хьуну махъ, дукьан дуллан бивкIссарив утти ичIаллил ххиличIрурду республикалул хъун шагьрулий?

Премьер-министрнан пикри хьуну бур ххал буван му масъала цукун бартбигьлай буссарив вай байраннал гьантрай.

МахIачкъалаллал дязаннив­сса ца кучалий лявкъунни цIинцI-ччюрклил хъунмасса бакIу. Артем Здуновлул тапшур бунни 2 кьинилул дянив букьан буван му бакIу ва жавабрайн буцин низам лиян дуллалими.

Цайми кучарду ххал бувну махъ премьер мукIру хьунни цаппара кIанттурдай бакъашиврий цIинцI дичинсса контейнерду ва ттизаманнул кьаллу (бакру) бишин­сса кIанттурду. Муниятур цIинцI-ччюрклил бувцIусса пакетру ччи-ччиний кьабитлатисса. Хъун шагьрулул бакIчи Салман Дадаевлул тIимунийну, му масъала дузал баншиврул машан лавсун бур азарва контейнер, гьашину шагьрулун ласунтIий бур 2 азарва кьали – ми циняв шиккува бувссар.

ЦIанасса ппурттуву МахIачкъалалив биялну бакъар 800 контейнердал майдан ва 5 азарва цIинцI дичайсса кьали, мукунма къатри дуллалийнисса ххиличIрурду дичайсса контейнерду. ЦIинцI, ххиличIрурду дукьайсса техника дусса дур, мунил жаваб дулайсса дур региондалул операторну хъанахъисса «Лидер» тIисса компаниялул. ЦIинцI-ччюрк МахIачкъалалия дукьан дуллай байбивхьуну бур январьданул 1-нний 4 ссятраву.

Кьянкьасса коммунал ххи­личIрурду дукьан даврил хIалкьазия ххал бувну бивкIссар мукунма республикалул ливчIми шагьрурдайгу. Микку дуллалисса давурттал хIакъираву буслай, ДР-лул тIабиаьтрал луртаннал ва экологиялул министр Набиюлла Къарачаевлул кIицI бунни ливчIми циняв шагьрурдай марцIшиву дуручлай бушиву.