Дунияллул чемионнащал хьунабакьин оьвкуну бия шагьрулул спортрал школарттал тарбиялувтурайн (миннавух бия спортсментал инвалидталгу), спортшколарттал каялувчитурайн ва СМИ-лул
вакилтурайн.
Хьунабакьаву тIитIлай, шагьрулул администрациялул спортрал, туризмалул ва жагьилтурал иширттал комитетрал председатель Марат Ибрагьимовлул увкунни: «ХIакьину жура дуллай буру хъинну агьамсса даву, жува кьамул уллай буру жучIава цIа дурксса спортсмен Владимир Минеев, мунищала архIал барча буллай буру жулва спортсменталгу. Жун зу хъанахъиссару эбратну ва зул ххувшавуртту жун пахрулунссар».
Буллусса суалданухьхьун жаваб дуллай, Минеевлул бувсунни яла дакIний личIанмур ххувшаву диркIшиву дунияллул чемпионатрай, оьрмулуву 19 шинаву. Яла пашманмур иш хьуну бур кикбоксинграй ух шаву. Мунал тIимунийну, Дагъусттаннайн чIумуя-чIумуйн учIайсса ур бяст-ччаллайн хIадур хъанан ва шикку хъинну игьагулагайсса ур. Бувсунни мукунма муданасса муттаэ МахIаммад Исмяиловлущалсса аралугъраятугу.
ЦIанасса ппурттуву Минеевлул машварартту хъанай бур Александр Емельяненкощал хьунтIисса бяст-ччалданул хIакъираву.
Яла Марат Ибрагьимовлул дандиуккун ва мунал тренер МахIач МахIаммадовлун буллунни барчаллагьрал чагъарду хъуншагьрулий спорт лябуккан бавриву бихьлахьисса захIматрахлу.
Муния махъ хьхьичIунсса республикалул спортсментуран дуллунни наградартту.
