Хъусращиял Шамххалая чIявуссаннан къабавнугу, къакIулнугу бакъахьунссар. Бунугу, ттун гъанну хьунаакьинсса кьисмат хьунни ванал арс Раджабов Базащал. 

Ва цIанасса ттулла макьалалувун на ласав арснан цала буттая дакIний ливчIмургу, нава ттинин луттирдай бувккумургу, Хъусращиял жяматрая бавмургу.

Ражавл арс Шамххала увну ур Хъусращиял шяраву 1924-кусса шинал. Буттал шяраву школа къуртал бувну мукьах ацIния шанна-мукьра шинавусса Шамххала занай ивкIун ур Азирбижаннал чуллайх къалайчинал чагуртну.

---

1941-1942 шиннардий Шам­­ххала увцуну ивкIун ур захIматрал фронтрайн, танкардайн къаршисса дайгьузанну дуллан, Ленинккантлив, Къая­ккантлив. 1943-ку шинал тIурча, цала оьрмугу сайки кIилий хъунма бувну, цала буттахлу лавгун ур аьрайн – душманнайн данди ацIан. Мунал буручлай ивкIун ур чIявуну командиртал ва тIайла буклай ивкIун ур ясирну багьми (конвоировал) ца кIаная гамур кIанайн. Шамххала гьуртту шайсса ивкIун ур фронтовиктуран ккаккан буллали­сса циркиравухгу. Чурххай ххишала бакъа хъунмасса гуж бу­сса мунал агьали махIаттал бай­сса бивкIун бур, кIира пут ду­сса гира тIуркIутIи дурну. Шам­ххаллул лахъшиву диркIун дур 2 метра ва 4 см. кIушиву тIурча – 140-150 кг.

Дяъвилия зана хьуну ур 1945 шинал тамансса наградарттащал ва командованиялул чулухасса барчаллагьрал чагъардащал.
Аьрая увкIун махъ зун ивкIун ур гъаттарал пирмалул каялувчину. Мукуна му биттур буллай ивкIун ур комсомол организациялул секретарнал къуллугъгу. Зий ивкIун ур Хъусращиял колхозрал председательнал хъиривчунугу.
Ражавл арс Шамххала хъанай ур Дагъусттаннал лачIун уккаврил арийла чемпион. Ванал ялун цIагу дур «Дикий борец» тIисса. Мукунма цалчинсса кIанттурду бугьайсса бивкIун бур чару ливчуну ва пут палцI дурну.

1929-ку шинал Шамххалал бувцуну бур цанма ччан хьу­сса душ. Вайнная бивзун бур 12 оьрчI-душ. ХIабибуллагьлул душ Шансубани хъанай бур Нину-Виричу. Ца душ аьпалул хьуну бур, ялами сагъну- саламатну бур. Циняв оьрчIругу бур нитти-буттаха лавхьхьусса, захIмат ххирасса, итххявхсса.
Нину дунияллия ларгун дур оьрмулул дурагу 67 шинаву. Цува Шамххала тIурча, аьпалухьхьун лавгун ур 2006 шинал.

— Буттал жу жунна-жунна хасъсса, дан бюхъайсса давриха зузи байвав, душругу ниттин кумаг буллали байва. Ппу мукунсса къаивкIссания, шайссияв тай захIмат-жапасса шиннардий 12 оьрчI бакI буккан бан. Ни­ттилгу жу кувннал хIурмат кувн­нал буллан, хъунаманал увкумур чIивиманал щаллу буллан буржлув байвав. Хъуниминнал янна-ус мюрщиминнахь лаххан дуллай, 12-гу оьрчI янна-калул ва къюссул щаллу байвав. Мунияту жул кулпатрава бувкмигу захIмат ххирасса, инсаншиврул бутIа ххину буллусса буссар, — тIий ур арс База.

Укун яргсса оьрмулул ххуллу бивтун бур лачIунукку, фронтовик, цIакьсса зузала, 12 оьрчIал ппу, тIабиаьтралва буллусса гужрал заллу Раджабов Шам­ххала Ражавл арснал. Аьпа баннав цал!

ХIусайн Давыдов,
ш. ЧIурттащи