Совет заманалия ирсирай лирчIсса колхозругу ца-цаних тIий дух дурккун, миннун кIанттай сакин буллалисса СПК-дал ялувсса аварарттугу,

ччалаччавурттугу ххинугу чIярусса дур. Ми цирдагу хъунмурчIин дайдихьу дусса, дайлитIу дакъассану хъанай дур.

---

ЧIурттащиял СПК-лул лагмасса тагьардануцIун бавхIуну

Уттигъанну «Илчилул» редакциялийн бувкIунни Лаккуйсса ЧIурттащиял жямат­рал чулухасса цаппара вакилтал. Вайннал лавсун бувкIунни ванияр шанма зурул хьхьичI хьуну диркIсса ЧIурттащиял агьалинал сходрал протокол.
Му протоколданувасса ца­ппара тезисругу аьлтту дуллай, шиккува учин ччай буру укунсса зат.

Гьай-гьай, халкьуннал, хаснува зунттавусса жяматирттал, буттал аьрщарацIун, хъу-лухччинуцIун, ризкьи-кьинилуцIун бавхIусса масъалартту та-бухьурчагу яла къювумину ва цIуцIимину бивкIссар. Ца варси личинуксса аьрщарал парчлул ялув жула ппухълу жан дулун махъаллил къашай­сса бивкIссар. Муниву диркIун дуну тIий хъудугьул жангу, рухIгу. ХIакьинугу мува мури, хъуннасса личIишиву дакъа­ссар. Аьрщи – му ца яла хъунмур хъус-ххазинар. Мунийн бувну муницIун дархIусса хIакъи-хIисаврттугу дикIан аьркин­ссар, гьарца чулуха ххал диргьуну, дирчIан дурсса, цалий дацIан дурсса.

Агарда, жяматгу чулухух бивхьуну, цагу, кIиягу, шамагу инсаннал, тIайлассагу, къатIайлассагу ххуллурду ишла буллай, агьалинал аьмсса аьрщив цалалуш хьун дуллай бухьурча, мунил хьхьичIалу хьхьичIва-хьхьичI кьукьин аьркинссар жяматрал цилва. Микку хъунмур махъгу, биялагу бикIан аьркин­ссар цихьва жяматрахь. Миннал махъ ца бувну бухьурча, щищачIав цичIав бан къашай­ссар. ЦичIав бан къашайссар­ я жул редакциялуща, я хIатта суд-диваннащагума.

ЧIумуя чIумуйн бучIай «Ил­чилул» редакциялийн, СПК-луцIунгу, цайми-цайми масъаларттацIунгу бавхIусса, ца жяматрал дянивсса мурадру бартбигьин къахъанай, ва танахун, та ванахун агьну, лагьу-лахъунттал бувцIусса аьрзарду, лабизавуртту, махъва-махъ учинмургу хьхьичIва-хьхьичI тIутIисса аварашивуртту.
Ва ххуллухгу биялсса инсантурал къулбасругу дусса аьрза жул редакциялийн лавсун бувкIминнахь тIутIимургу вава вари: зулла дазу-зума рищун дара щалагу жяматрахь.
«Илчилул» редакция

Ялавай бишлай буру жямат батIаврил протоколданул мурадравасса цаппара кIанттурду (редакциялийн лавсун бувкIсса куццуй).

Жул ЧIурттащиял хьхьичI­ра диркIсса «Ххяххабаргъ» тIисса колхоз сакин хьуну дуссия шанна шяраваллил жяматраяту – ЧIурттащи, КIулушацIи, Читтур. 1991-ку шинал, ЧIурттащиял жямат личIи хьуну, сакин дурссия «Чуртах» тIисса жуллалусса колхоз. Му колхозрал председательнугу увчIуну уссия ХIасанов Шагьрамазан. 1999-ку шинал ХIасанов увкьун, мунан кIанай ивтссия Аьли­ев Шагьрамазан.
2001-ку шинал декабрьданул 10-ннийн, щала жяматгу бавтIун, колхоз «Чуртах» дукьан дурну, сакин бувуна СПК, «Дружба» тIисса цIанилу. Му сакингу бувссия, щала жяматгу мунил члентал бувну, закондалул аьркинсса шартIругу щаллу дурну.
2006-ку шинал тIурча, да­къасса колхозгу душиврий хIисав дурну, жямат бавтIшиврул протоколгу бувну, «Чуртах» тIисса цамур СПК бувну бия. Мунил хъунаманугу ккаккан увну ия ХIажиев Сиражуттин.
Муния шиннай сукку хьунни жул жяматрал дянивсса, хъинну лахъи ларгсса, ччалаччавуртту, цалийн къабукIлакIавуртту.

Ми иширттал ялув жул агьалинал чивчуссия Дагъусттаннал хIукуматрайнгу, амма вари чин­сса дахханашиву къархьунни.
Ттинин хъанай бивкIмургу, хIакьинусса тагьаргу хIисавравун ларсун, жу цал уттигу тавакъю буллай буру Лакрал райондалул администрациялухьгу, ДР-лул хъуниминнахьгу, жул жямат­райн дагьсса захIматшивугу лаларсун, агьалинан кьамулмур, хIакьмур тIайла бацIан бара, чIарав бацIияра тIий!