ЦIусса шинал дайдихьулий лакрал литературалуву ккалли бансса иш хьунни гьунар бусса чичу Алексей ХIажиевлул рубайрду «Литературная Ро­ссия» (№ 2020 / 1, 16.01.2020) кказитрай бищаву. «БувцIусса кьуругу, кьавкьсса янсавгу …» тIисса цIанилу.

---

ПатIимат Рамазанова
Ккуллал шяравасса Алексей ХIажиев Москавуллал авиациялул технологиялул институт къуртал бувсса инженер-механик ур, зийгу ур АхIмад-Хан Султаннул цIанийсса «МахIачкъала» аэропортрай. Литература ххуйну кIулсса, кIулшивурттал хъирив агьнувасса ванал оьрмулуву яргсса ххуттай бур поэзиягу. Алексей лакку мукъул кьадру кIулсса, бюхъу бусса заргалнал хатIлий махъ усттарну капливун бутайсса автор ур.

Ванал лакку мазрай чивчуну бур шанттуршунниха ливчусса рубайрду. «Литературная Россиялий» ванал оьрмулия кутIасса справкагу дуллуну дур. Шеърирду оьрус мазрайн таржума бувну бур Галина Булатовал. КIицI къабувну битан къахьунссар Алексей ХIажиев «Илчи» кказитрал муданасса дусгу ушиву. Яла гужма критикгу ушиву. Миллатрал бучIантIимуний дакIцIуцIаву дусса, лакку мазгу ххирасса ванал аьйрду жу кьамулгу дувай­ссар, къаччангу къабикIайссар.

ДакIнихтуну барча тIий буру Алексейхь сий дусса кказитрай­сса публикация. БувцIусса кьурттарал ва кьавкьсса янсаврал ссигъа бувчIинсса ва шаэрнал дакIнил дунияллийн биян­сса тIайлабацIур вагу.

*
Гъалгъанияр – хIинча
лахъисса хъинссар:
Махъру гьарза хьурча
аьйкьин бюхъайссар.
БачIвасса ххуттардил
ттуршра чIапIуяр
Аькьлулул бувцIусса
мукьва хха хъинссар.

*
ТIааьнсса къабикIай
тIайласса махъру,
ТIайласса къабикIай
тIааьнсса махъру,
Лажинлякъул дурсса
саннардунияр
Хъинссар, кьурчIинугу, тIайласса махъру.

*
ТанинцIа зананнав,
ацIу, ххуллулссай,
Аглан хьу, щяикIу,
ттучIа, ва кувссай.
Лякъинсса хияллай
гъурбатрай талихI
НахIакь малугларда –
вапа ба уссай.

*
Щаращив кьакьарча
кьакьайссар нехгу,
МархрацIа буварча
багьайссар мурхьгу,
Буттал аьрщарая
арх увцуманан
КьурчIиссар шаравгу, кьурчIиссар ччатIгу.

*
Кьунну ттун ккарккунни
аьжаивсса макI:
Жулва ццуццул кьяртай
хьун дия хъанакI.
Гъи чIарах дурккуну,
лажинни ттигу
Мякьнура лирчIссарвав хъункIултIутIах дакI?

*
Ттун ккавкссар бургъил пар
бярув, щинаву,
Зунттал неххардийсса
някI микIираву,
Так бургъил чанигу,
гъилишивугу
Ккарккуссар, ххирамур,
вил яруннаву.

*
Дарунна къадикIай
ялув някIссавгу,
Ца задраву дикIай
цамур хIисавгу –
Дуниял гьанайссар –
хIадурну бити
БувцIусса кьуругу,
кьавкьсса янсавгу.

**
Ца дакI цIимилулсса, ца – «бияй кацIа»,
Цаннал тIуллу ххуйсса, цаннал – ххуйсса цIа,
ОьрчIру – мий тIутIиври. Жунма кIуллихха:
Цасса кьанкь къадикIай циняв тIутIацIа.

**
ЦIан ттуруллал бугьай ссавний гъили баргъ,
Къурахшиву дагьну кьакьай щинал арх.
Жагьилшив чIумуйссар – ларгун лякъайссар,
Так цалли дикIайсса уртту-тIутIуй аргъ.

**
Арцу-мусийн кьяркьи къалачIунтIиссар,
Луххавугу алмас пар-пар тIунтIиссар,
Махъамазбувул рирт зидлил чIатIаракI
Ша, ка, пикри марцIнайн къакьутIинтIиссар.

**
Дунъяллий гьарцаннал ххуллу цар бусса –
Дайдихьугу цасса, ахиргу цасса,
Лахъазантту, кьаркру, ламурду тIурча
Му ххуллий гьар каснал бур цалвалусса.

**
Мюрш гъарал вирхху бувний аргъ дизай ардаравгу,
Ттул мурччал пиш увкуний пар ликкай вил иттавгу –
Ва дакъарив оьрмулул уттарашиврул лишан,
Жунна чагъирай дуний ччавугу, аьрщи-ссавгу?!

**
ХIакьину на бурттий, гьунттий – ина чай,
Ва куццуй наниссар дуниял, маччай,
Ина тIурчан ура хияллал увцIун,
Гава-га къатIулу гава-га бюрх ччай.

**
Канийсса кIисригу цасса бакъассар
Закканттуву тIурчан – циняв архIалссар.
Шинну, манзил, къуллугъ, жинс, миллат, тухум –
Дусшиврун царагу мий сан дакъассар.