Декабрь зурул 8-нний Дарбантлив хьунни Дунияллул халкьуннал дянивсса миллатирттал культуралул ва искусствалул фестиваль World Folk Vision.
Ванил хIасиллая бусласисса пресс-конференция хьунни «Дагестанская правда» кказитрал редакциялий.
Андриана Аьбдуллаева
Шикку гьуртту хьунни мероприятиялул спикер, ЕОЭС-рал (Евразийская организация экономического содружества) культуралул масъаларттаха зузисса комиссар Жанна Барсегова, фестивальданул председательнал хъиривчу Разита Мушидова, художник-модельер, дизайнер Индира Бадияр, фестивальданул Дагъусттаннайсса вакил Сефрижат МахIаммадрасулова, фестивальданийсса Дагъусттаннал СМИ-рдал вакил Шафи Акушали.
Жанна Барсеговал бувсунни World Folk Vision фестивальдания ва уттигъанну Дарбантлив хьусса региондалул ятIапрал хIасиллая.
Компания World Folk Vision цIанасса чIумал щуруй дур 80 билаятрай. Вай билаятирттай зузиссар фестиваль-конкурсралсса буллалисса муданнасса представительствартту. Вай бакъассагу, 100 хIукуматрахь ихтияр дур конкурсрай гьурттушинна дурну цала миллатрал культура ккаккан дан. Дагъусттаннай гьашину кIилчин хъанай дур региондалул тур.
Тарихрал ва культуралул центр хIисаврай кIирагу шинал фестиваль тIайла дурккунни Дарбантлив. Конкурсрай гьашину ларгсса шиналнияр чIявусса гьуртту хьунни. 750 инсан увкIун ия Дагъусттаннал личIи-личIисса районная шикку гьурттушинна дан. Вайннал ккаккан бунни цала гьунарду къавтIавриву, балай учавриву, музыкалул инструментру бищавриву, ккаккан бунни сянаткаршиврул даража. Гьурттучитураву бия мюрщисса ва хъунисса, любительтал ва профессионалтал. Сакиншинначитурал бусласимунийн бувну, гьурттучитал цаннаяр ца яргсса, гьунар бусса буну, жюрилун бигьану къабивкIун бур язими личIи бан. Конкурсрал хIасиллайн бувну ххув хьунни школа-студия «Лезгинка», Лаващиял райондалиясса «Ритмы гор» ансамбль ва Оьргърал усттартал Бахтияр АьвдурахIманов ва Рабадан Умалатов.
Вай гьантIиссар январь зурул 7-12-нний Сочилий хьунтIисса Аьрасатнал финалданий гьуртту хьун. Укуннасса фестиваллу хьунтIиссар 80 билаятрай. ЦачIа-цачIава ххув хьуми гьантIиссар Дунияллулмур ятIапрай гьуртту хьун Саудуллал Аьрабнал хъуншагьрулийн Эр-Риядрайн.
ДакIнийн бутан, ларгсса шинал Аьрасатнал 7 региондалиясса вакилтал лавгссия Дунияллул финалданий гьуртту хьун. Гран-при ларсъссия Дагъусттаннал коллективрал – Лаващиял райондалиясса «Авадан» ансамбльданул.
ТIайлабацIу чIа учинну региондалул ятIапрай ххув хьусса Дагъусттаннал вакилтуран гихуннайсса турдайгу.
