«Аьрасатнал язисса 100 школа» тIисса конкурсрай ххув хьунни Каспийскаллал шагьрулул 9-мур школа, мунил директор,
Хъюйннал шяраватусса ХIажиев Сергей РахIимлул арснан тIурча, дуллунни «Шинал директор – 2019» тIисса лишан.
Бадрижамал Аьлиева
Вай наградартту шадлугърал тагьарданий Сергей ХIажиевлуйн тапшур дуллай, шагьрулул цинявппагу къуллугъирттал вакилтал бавтIсса кIанай тIайлабацIу, цIу-цIусса хьхьичIуннайшивуртту чIа увкунни шагьрулул бакIчи МахIаммад Аьбдуллаевлул.
ХьхьичIми шиннардийгу ва школа лайкь хьуссар укуннасса журалул наградарттан.
Ца-кIива махъ школалул тарихрая. Ва хъанай бур Каспийск шагьрулул ца яла «жагьилмур» школа, тIивтIуссар 2008 шинал. ЦIанасса чIумал школалий бур 56 класс, 1485 дуклаки оьрчI, 99 педагог.
2014-ку шинал школа лайкь хьуссар кIулшиву ва педагогикалул элмурду хьхьичIуннай даврил Дунияллул халкьуннал дянивсса академиялул лараймур наградалун ккаллийсса К.Д. Ушинскийл ордендалун, директор Сергей ХIажиевлун тIурча, дуллуссар А.С. Макаренкол лишан-медаль.
«Школа будущего» тIисса цIанилусса щалагу Аьрасатнал форумрал хIасиллайн бувну, вава школа ххув хьуну бивкIссар «Аьрасатнал язисса 100 школа» тIисса конкурсрайгу, Сергей ХIажиевлун дуллуссар «Директор года – 2016» лишан.
Ва школалул учительтал цимилгу ххув хьуссар шагьрулул ва республикалул даражалий дуллалисса личIи-личIисса конкурсирттай, мукунма дуклаки оьрчIругу.
ЦIуну ларсъсса ххувшавугу барча дуллай, чIа тIий буру школалул коллективран цIу-цIусса хьхьичIуннайшивуртту.
