[dropcap]В[/dropcap]ай ЦIусса шинал хьхьичI гьантрай «Илчи» кказитрал хъин хъамаличуну хьунни Каспийск шагьрулул военком, Цалчинмур ранграл капитан,

дунияллул океандалул личIи-личIисса регионнайсса мукьва аьрали къуллугърал гьурттучи, ляличIисса аьрали бутIрал ветеран, КIундиннал шяравасса Кьурбанов Геннадий Шихаьлил арс.

---

— Геннадий, ина увну ура Дянивмур Азиянаву, Таджикисттаннай. Амма вин ххуйну кIулну бур ниттил маз, хIатта гъалгъа тIий ура марцIсса кIундиннал лугъатрайгума…

— Таджикисттаннай увнугу, жул кулпат гьарца шинах бияй­ссия Лаккуйн. Му бакъа­ссагу, ххюра шин дурссар ниттил ниттичIа КIундив. КIундиннал дянивмур даражалул школалий дуклайгу ивкIссара. Хъунна бавал шийва кьаити тIий, шяравува авцIуну, 4-5-мур классру на кIий бувккуссия.

— Буси вила оьрчIсса оьр­мулиягу.
— Таджикисттаннаймур оьрчIшивугу ларгуна, чIявуми оьрчIал кунна, тихун-шихун лихълай, вяйлиллай, аьпа биву мяммаяту мадара кьутIругу лаяйва, цамур куццуй къабувчIайхьунссия ттун. Ххирая мотоциклетру, моторду бусса велосипедру. Мотогонкардай цал ччан гъавгъунгу уссияв.
Га чIумал Душанбайлив чIя­вусса лак бикIайва яхъанай. Ттущал ца классравугума бикIайссия КIундиясса оьрчIру, масалдаран, Массуева Аслижан тIисса душ. Школалий унава спортрахун агьссияв, спортрал мастернал цIагу ларсъссия, Таджикисттаннал чемпионнал цIагу дуссия (лачIун уккав­рил).

[dropcap]Ш[/dropcap]кола къуртал бувну махъ Физкультуралул институт­равун уххансса пикрилий уссияв. Физкультуралул институт тIурча, шагьрулул кьатIув бикIайва. Ми­ккусса цалчинсса тренировкагу кIюрххил ссят 5-нний дия дайдихьлай, ттун багьлай бия му чIун хьуннин тиккун ияван. Му я автобус, я троллейбус занази­сса чIун дакъахьувкун, ссай-унугу иян аьркинахха, авцIура атIахь ва мяммахь ттун мотоциклет ласира тIий.

Къаласунну, му сававну гъавгъсса ччан къагьарив вин, утти бакIгу ппив бан ччай урав тIий, цукунчIав рязи бан къавхьуна. Къаласурча, нагу аьрали училищалувун гьанна учав. Яла ура, нава нитти-буттахь увкусса му­къурттил мяъна лаласлай, ттухьва нава «циванни къауххангу аьрали училищалувун» тIисса пикрирдай. Школалий жул икIайссия тарихрал учитель Гасумов Рафаэль Павлович тIий, хьхьичIва спецназравугу ивкIсса, боксрал спорт­рал мастер, цалчинсса атомрал бомбалул разработкалул гьур­ттучи. Мунахь бусав цукунсса иш-тагьар дуссарив. Муналгу хъин чулий ккавккунни аьрали ва хьхьирил училищалувун дуклан гьан ччисса ттул пикри.

ЩяивкIун поездрайгу, нитти-буттангу къакIулна, авчура. Ачин хьхьичI так ца ниттиуссихь Мужаидлухь бусав нанисса кIану. Му увкIунни вокзалданийн на тIайла уккан. Бусав мунахьгу ссал цIанийрав, чуннав. Му, ацIу, малагара, на вин ччарча мотоцик­лет ласунна, ччарча машина, квартира ласунна тIий ия. Лагу-ласунтIиссия, му каши дия, ювелир цехрал хъунаману икIайссия тих га чIумал. Тамансса хIал хьунни мунал на ацIан уллай, нарив ттула мукъуя ти-шинай къавхьура. Микку мунал увкуна: «Ургу, угъраш, на вихь гъалгъа тIий ваксса чIун гьан дував. На увагу усса ца инсан ура цIана вил чул бувгьусса.

Амма, кIулну икIу, му ххуллия тихунай-шихунай хьурча, вил цалчинсса душман ттуяту хьунтIиссар. Инава буллусса адаминал махъ бацIан бува!». Мукунгу куну, кагу дуллуну, арцул ча­гъаргу ливкIуна ттул жипливун.

Поездрай Владивостокрайн най жу шама оьрчI ияв (цайми оьрчIру самолетрай лавгуна), ацIра хьхьу-кьини хьуна жул ххуллий. Диялсса конкурсгу дия, буххан ччими сайки ацIлий ххишаласса бия. Душанбайлиясса вайми оьрчIру къабувххун, поездрай архIал най бивкIсса жу шамагу бувхру дуклан (Тихоокеанское высшее военно-морское училище им. С. Макарова). Ххюра шинайсса училище бия му. Муния махъ байбивхьуна ттул аьрали ва хьхьирил къуллугърал ххуллу.

— ЦIанакул вила арснал дурссания мукуннасса даву, га чIумал инара куннасса, вил ци реакция дикIанссия?
— Мукунсса иширттаву мудангу тIайламунил чул бувгьуну икIан аьркинссар цу-ухьурчагу. Ттула ниттиуссил ттухьва увкусса ку­ццуй, нагу учинтIиссия мунахь: «Бував мукунсса пикри, адаминал кунма, муния ти-шинай машара, захIматри-жапари маучара», — куну.

— Щинал лув зуншиврул, инсаннал хасиятрал ци лишанну дикIан аьркинссар? Ччи-ччинаща къабюхъайхьунссархха му къуллугърай зун, щинал лув цимивагу зуруй яхьун?
— ХьхьичIа-хьхьичI инсан цала ялув цува авцIуну икIан аьркинссар, кIулну бикIан аьркинссар цува ци даврийн нани­ссарив, инсанная цаятува хъар бакъа, ччимур чIумал ччимур хьун бю­хъайсса кIанайн най ушиву. Щинал лувсса жамилий­сса къуллугърал ца яла хъунмур ляличIишивуну хъанахъиссар ца инсаннал гъалатI сававну щалагу жамилийцири оьрмурдацIа хьун ягу миннан зарал-зиян биян бюхъаву.

— Бан-бит бакъасса тагьарданухун, иширахун багьсса кIанттурдугу хьу­ссарив щинал лувсса къуллугърал чIумал? Учиннуча, личIан-къаличIан тIисса.
— Мукунсса ишру цимивагу хьуссар. ЛичIан-къаличIан тIисса ишругу хьуссар, подлодкалул отсекирттаву цIу ларчIсса чIуннугу хьуссар. КIицI банна миннувасса ца. Цал, Средиземный хьхьирий бусса чIумал, на ура «жилой отсек­рал командирну». Ца отсекравун цIу дагьарча, му, гайминнуйнгу къадагьан, автомат журалий щапI куну лакьайссар най бунува. Гивува ливчIминнал цIу лещан дуварча дурссар, къадарча къадурссар – къурталссар. Му ххуллух цIугу лещан дуван хьуну, муния махъ му цIу дагьну диркIсса отсекравами ттуламур отсекравун кьамул буван багьлай бия. Амругу бувкIунни, кIилчинмур отсекравасса инсантал цалчинмур отсек­равун кьамул буван хIадур хьира тIисса. Амру бувссия противогазру лаххан, мукунсса тIалавшинна дуссар, бугълил къахьуншиврул.

[dropcap]Ч[/dropcap]Iаравсса ца узбакIнаща, лахлай унува, маска ххяларгуна. Му дакъана отсек тIитIирча, га, бугълил хьуну, ивчIан най ия. Микку га лахIзалий на ттулламур маска дуллуссия ганайн лаххан. Муния махъ на кIулшилия лавгун ивкIун ияв. ЧантI увкунав щинал ялув, на ттуйна нава учIаннин 2-3 ссят хьуну дия. Микку ттуйн каялувшиндарал чулуха хъуннасса аьй дуркIуна: «Ина, ца матроснал пикри бувну, мукунсса даву дурну дур. Вин ци-бунугу хьуссания, щаллагу подлодкалийсса инсантал буккан бувансса цама специалист акъассияхха, ина низам лиян дурну дур», — куну. Амма хIакьинугу на гукуннасса даву дувантIиссия, агарда гара тагьарданухун агьну ивкIссания.

— Му чIумал ина кулпат бувну урав? Жалин инава язи бувгьуссияв ягу нитти-буттал буцин увнав?
— Му кулпат бан увасса чIун дия. Нитти-буттал кулпат лякъиннин ацIайссарив адамина, ттулва я бавцIусса душнил хъирив увкIун Лаккуйн, бувцуссия ХуцIаев Надиршагьлул душ ПатIимат. Му КIундив жул чIахху-чIаравппа ялапар хъанахъисса, ччянива ттула итталун багьсса душ бия.

— Билаятрайн апатI ли­ккан бувсса гай шинну аьрали ва хьхьирил къуллугъирттай зузиминнал цукун дурхIуссия? Бан-бит бакъа ливчIсса му­ттагу шайвав?
— Бан-бит бакъа ливчIсса тIисса калима тачIаврагу дикIан къааьркинссар инсаннал, хаснува аьрали инсаннал. ТIайлассар, харжру къабуллай цикссагу барзру шайва, аьрали ва хьхьирил къуллугъ буллалимигу ци банссарив, кулпат, оьрчIру цукун бакI буккан банссарив къакIулну бикIайва. Му чIумал ПатIиматлул ва ттул дянив кIива душ хьуну бия (арс Руслан махъ увссар). Кулпатрал уссугу икIайссия жущал, кулпатгу бувну. Мукун, жу кулпатраву 6 инсан икIайвав ца ттул паекрай бакI буклай. Амма мукунсса, ца жу бакъа бакъа бакъаяв, цикссагу кулпатру бия.

— Дагъусттаннаясса чIявусса оьрчIру бурив билаятрал аьрали ду­ккаврил идарарттавун бухлахисса?
— Къачанни. Гьашинугума 34 инсаннал кьаст лархIунни дуклан уххансса, тIайлассар, миннава 16 акъа къаувххунни – мигу ца Кас­пийскалия къачаннихха.

— Вин вила тухумрая, хьхьичIми никирттая цуксса гьарта-гьарзану кIулли?
— На мудан хIайранну, махIатталну икIара ингушнай, миннан арулла никирайн дияннинсса нясав кIулну дикIай. Ттун, тIайламур бусан, ттула ттатта­хъая ва бавахъая гихуннайми ник­ру ххуйну къакIулли, цуксса ламуснугу.

— Винна муксса ххирасса спортрахун цIанагу агьна урав?
— ЦIанакул спортраха зун­сса личIисса чIун къадикIай, бю­хъай хьхьичIва кунмасса гъирагу къабикIан, шиннугу, туну, ряхцIалла шавай дур.

— Буттал шяравун, КIун­див, цуксса ччяни иян бюхъай? КIий цу уссар?
— Лаккуйн занансса гъира хъунмар, амма чIявуну занан­сса чIун къадикIай. Буттал къатри дуссар. Гъинттул чIумал нину дикIайссар кIий, мукунма щарнил нину-ппугу.

— Ялун нанисса ЦIусса шингу хIисавравун ларсун, «Илчилул» буккулт­рахь, аьрайн буцин­сса оьрчIру бусса нитти-буттахъахь ци учинна?
— Нанисса шингу ларгмурнияр личIину бигьасса къаля­къай. Цукун-бунугу, чIунну ци дучIарчагу, инсантуран инсаншиву хъамакъаританнав. Жулла паччахIлугъ, республика гьаз даврил цIаний жува къазурча, му даву жухлура щилчIав къадантIиссар. Жагьилтал жулва бучIантIимурди, миннахь аьркинмур бусавугу, багьайсса ку­ццуй ми тарбия бавугу жуйвасса хъунмасса буржри.

Шаппа жува жула оьрчIащал къадагъалийсса, насихIатрайсса ихтилатру къабулларча, ми телевизорданул, интернетрал, кIичIираваллил тарбия буллай бур.
Аьрайн нанисса оьрчIан, миннал нитти-буттахъан, жулва гъан-маччаминнан, шяраваллал инсантуран хьхьичIра-хьхьичI чIа тIий ура цIакьсса цIуллушиву, хъинмунийнсса умуд чан хьун къабитаву.

— Зула кулпатраву цукун хьунадакьару ЦIусса шин? Щинал лув ЦIусса шин хьунадакьин багьссагу хьуссарив ишру?
— Щинал лув цал хьунадаркьуссар цIусса шин, къуллугърал буржру биттур буллай. Замполитнал ца тIюксса елкагу бивхьуна. Компотрахун, чяйлухун тортгу бувкуссия, ккаккан дурсса 50 гр. чяхирданулгу хIарчIссия.
ИчIура, чIявучил кунна, хьунадакьару, бивхьуну елкагу. Ва ххуллухгу душругу, куявталгу, душнил оьрчIругу, арсгу лагма лавгун хьунадакьинсса ният дур.

Ихтилат бувссар Руслан Башаевлул
Чивчуссар Бадрижамал Аьлиевал