Гьарца шинах шайсса паччахIлугърал бакIчинал пресс-конференция ккаккан дунни «Россия – 1», «Россия – 24», «Цалчинмур канал», «НТВ» телеканаллавух ва «Маяк», «Вести ФМ» ва «Радио России» радиостанциярттавух.

[dropcap]Б[/dropcap]акIрайва В. Путиннул бувсунни гьарца шинал ахирданий дайсса пресс-конференциялул мяъна душиву шин цукун ларгссарив ва мунил хIасиллу цукун­сса хьуссарив бусаву. Бувсунни хIадурну ушиву суаллахьхьун жавабру дуллан.
Гьашину пресс-конференциялий гьур­тту хьунни 1895 журналист.

В. Смирновлул буллунни цIинцI-ччюрклил реформалул, му анавар дуккан даврил хIакъиравусса суал.
В. Путиннул мунил хIакъираву бувсунни шинал лажиндарай билаятрай лази-лакьи дуллай бушиву 70 млн. тонна цIинцIлил. Мунил хIакъиравусса хIукму хьуну бур: сакин бувну бур федерал оператор, дузал бувну бур 200-лихъайсса регионал оператортал, кьамул дурну дур му масъала чулийн буккан бансса территориал пландалул схема. Микку аьркин­ссар агьалинан бувчIин буллан чув ва цукун лази-лакьи дуллантIиссарив цIинцI ва ххиличIрурду.

Пресс-конференциялий «Школа, гимназия, лицей» тIисса журналданул хъунама редакторнал Владимир Путиннухь тавакъю бунни МахIачкъалаллал мэрну ивкIсса Сяид Амиров судрал кьувкьусса, оьрмулухун дуснакь аврил, танмихIрая мурахас уван. Владимир Путиннул жавабран тIимунийну, Амировлул чIярусса законну лияндавуртту судрал тасттикь був­ссар. Судрал мурахас увайссар инсан, цайми иширттацIун бавхIусса танмихIрайн кIункIу увну ухьурча.
Ва пресс-конференциялий сукку бувсса суаллал ва жавабирттал хIакъираву жу бусанну хъиривсса номерданийгу.