Ххуллункьини ЦIуссалакрал райондалий хьунни 1999 шиналсса дяъвилул иширттаву чувшиву ккаккан дурсса ополчентал лахъа-хъун буллалисса мажлис.

Гьашину 20 шин кIицI ларгунни Дагъусттаннал аьрщарайн ххявхсса дунияллул террористътал ххит бувну. ХIа­кьинусса кьинигу районнай, шагьрурдай найнна дур вай иширттацIун дар­хIусса мероприятияртту.
ЗахIматсса кьинирду лахъан багьссар та шинал ЦIуссалакрал агьулданун. Оь экьибувтIусса, унгу-унгусса дяъви най бивкIссар ЦIуссалакрал аьрщарай.
Дяъвилул цалчинсса кьинива ЦIуссалакрал райондалий жандалуцIа хьуссар 16 инсан. Тай иширттал цIунилгу ккаккан дур­ссар жула чиваркIуннал кьянкьашиву, яхI-къирият.
Ххуллункьини ЦIуссалакрал райондалий хьунни 1999 шинал­сса дяъвилул иширттаву чувшиву ккаккан дурсса ополчентал лахъа-хъун буллалисса мажлис.

Ванил сиптачину ва сакиншинначину ия Лакрал национал советрал председатель, тай шиннардий ополчентурал штабрал хъунаману ивкIсса, Михаиллул арс Амучи Амуттинов. Ванал каялувшиву дуллай бивкIсса штабрал та чIумал хъуннасса даву дурссар. Гьарца кьини, хьхьунил ссят 11-ра хьусса чIумал, бавтIун, ци дуллан­ссарив, цукун зунссарив маслихIат щащай­сса бивкIссар. Тай ополчентурал дурсса чувшиврул бардултну хьу­сса Лакрал миллатрал национал советрал вакилтуран пикри хьуну бур цалла чулуха ополчентуран наградартту дулун.
Дулунсса медаллу заказ дурну дия Къазаннайсса цIа дурксса Монетирдал хIаятраву. Медаллал эскиз дурну дур Аьрасатнал Архитектортурал союзрал член, Дагъусттаннал ПаччахIлугърал премиялул лауреат ХIажикьурбан ХIажикьурбановлул. Виричунал ЦIукул ва ххаржандалул лишандалий дурсса медальданий чивчуну бур «Ватангу ядарду, яхIгу буруччарду». Вай мукъур­ттилва буслай бур ссахлу лайкь дур­ссарив ополчентурал вай наградартту. Наградартту дуллали­сса мажлис бачин бувну бия Амучи Аму­ттинов ва Камалуттин Будайчиев. ХьхьичIра-хьхьичIсса, Муслим Да­ххаевлун ккаккан дурсса, медаль дуллунни Муслимлул хъунама усси­хьхьун Ма­хIаммадлухьхьун. Дуллунни ополчентурал медаль цанна МахIаммадлунгу.
— Дяъвилул иширттаву хьхьи­чIунну гьуртту хъанай бивкIсса ополчентуран медаллу дуллуну, вай лахъа-хъун бан­сса пикри хьу­ссия жун: Муслим Даххаевлун, тани райондалул бакIчину ивкIсса Тимур Оьмаевлун, Лакрал миллатрал советрал исполкомрал председатель Камалуттин Будайчиевлун ва ттун. Жула пикри дузрайн буккаврия рязишиву духьурчангу, къащигу дур дакIниву, жула миллатрал ххаллилсса арс Муслим Да­ххаев цIана жущала акъашиврул. На мукIрура ва инсаннал Ватандалухлу жан дулуншиврийн, къавихра ванал хIукуматран, билаятран заралсса тIул дуршиврийн. Умуд бур ванал хIакъираву тIайламур бацIанссар тIисса, — увкунни Амучи Амуттиновлул.
Награда ласун увксса гьарцагу инсан бусраврай кIицI лаглайгу ия Муслим Даххаевлул цIа.
Дяъвилул шиннардий штабрал лархъсса хъуннасса хъаргу кIицI ларгун, Тимур Оьмаевлул дуллунни медаль Амучи Михайловичлунгу. Ванан мукунна дуллунни «Граждан позиция» тIисса жяматийсса идаралул чулухасса медальгу.
Ва кьини медальлу дуллунни 173 ополченнан. Миннавух бия: полковник Амжад Сулайманов, Тимур Оьмаев, Шяъван Оьмаров, АьвдурахIман МахIаммадов, Раджаб Идрисов (та чIумал ванал каялувшиннаралу итабакьлай бивкIссар «Ххувшаврихлу» тIисса кказит), ХIажикьурбан ХIажикьурбанов, АьвдурахIман Абакаров, Супиян Оьмаров, Хизри Рамазанов, Шарапуттин Аьли­мов, Камалуттин Будайчиев, ХIамзат ХIамзаев, Аьли Мутаев ва цаймигу.
Андриана Аьбдуллаева,
Имара Саидова.