Буруччинну инфарктрая

КъюкIлил, туннурдал къашайшивуртту,
инфаркт, инсульт шайссар туннурду бавщукун.

Тромба шаву му организмалул чара бакъа аьркин­сса даву дур (функция бур). Ва ба­къахьурча, чIирисса ххарци хьурчагу, оь бацIан бан къавхьуну, инсан оьлицIал хьун най ур. Амма туннурдайн азар щуну духьурча (масала, диабет ягу давлениялул туннурду кIюла бу­ккан бувну бухьурча), тромбардал биялсса зарал биян буллай бачайссар, кунницIун кув лачIлай тромбоцитру шай­ссар оьттул къурхъру – тромбарду.

Тромбарду бусса кIантту къума хьуну, оь нанаву захIмат шай­ссар. Агарда тромб хьуну бухьурча къюкIличIан нанисса туннурдаву, шайссар инфаркт миокарда, нярал артериярдаву хьуну бухьурча шайссар инсульт, ччаннавунсса туннурдаву хьуну бухьурча шайссар гангрена. Му ба­къассагу, тромбарду туннурдал чIирттая бувцун оьттущал бачингу бюхъай­ссар, бю­хъайссар къумасса гьутрурдал артериярдаву личIангу. Му чIумал дайдишайссар тромбоэмболия легочных артерий – цилгу гава цIана инсан ивчIан айсса.

Хъинну захIматри кIул бан тромба буссарив, бакъассарив, цанчирча цукунчIавсса къюву дакъану тIий. Тромбарду цивппа цал архIал гьарца кIанай шайсса бур. Масала, ччаннал туннурдаву бухьурча, тромбарду бикIантIиссар цайми кIанттурдайгу.

Ччаннал туннурдаву тромба бусса кIул шай­ссар, ччанну бяхълан бикIайссар, кIуну бикIайссар, ххалаххив кьутIлатIисса кунма бикIайссар, кIулши дурккун зирзилтIала духлан дикIайссар, ччаннал туннурду гьарта бувккуну бухьурча. Вай ялув кIицI лавгсса царагу лишан духьурча, оьттул анализ дулун аьркинссар на холестерин, тромбоцитру, протромбиновый индекс ва фибрикоген. Циксса бурив ххал буван. Агарда вай показателлу лахъсса бухьурча кьаралданияр, чара бакъа анаварну хъин хъанай байбишин аьркин­ссар. Яла гужмур тромболитинну хъанахъиссар аспирин хIаласса препаратру, вайннул кунницIун кув лачIлачIисса тромбоцитру буцан байссар. Амма, аспирин къахъинссар гастрит, язва думиннан.
КIилчинмур дарувну хъанахъиссар пиявкардал гирудин.

Мунияту тромбарду бусса инсаннан гирудотерапевтнал кумаггу аьркин багьайссар.
Тромбарду хьунссар тIисса нигьачIаву чан даншиврул, ишла дуллан аьркинссар холестерин чан байсса продуктру. Масалдаран, ххяххиялул нагь — шиву чIявуссар омега 3, омега 6.

Мунияту хъинссар кIюрххила хIачIлан 1 хъунна къуса зайтундалул ягу туртул гьаннарал аьгъушиврул, канан вай нагь дуртIусса салатру. БучIиссар гьантлий хIачIан чяхирданул 100 мл., щинал 2 л. Тромбарду бу­сса инсаннан кIусса давур­ттив дуллан къабучIиссар, тромба буцайссар, туннурдал чIирттан нигьачIишиву хъунна шайссар. Тромбоз дусса инсан дагъ дур­сса, кIурал дурсса, аьгъусса дукралия, пIапIрусрая махъаллил хьун аьркинссар.
ЦIуллуну битаннав.

ХIадур бувссар
Т. ХIажиевал