«Культура» тIисса национал проектрал лагрулий «Ревизор» спектакльданущалсса Лакрал театрданул гастроллу хьунни Избербаш ва Хасавюрт шагьрурдайн.
Зулайхат Тахакьаева
[dropcap]И[/dropcap]збербаш шагьрулий спектакль ккаккан бунни Оь. Батирайл цIанийсса Даргиял театрданул сахIналий. Спектакль ххал бан бувкIун бия шагьрулул 1-мур школа щалва. Театрданул каялувчи Мустапа Ибрагьимовлул кIицI лавгунни Лакрал театр хIакьинусса кьини республикалий ца яла хьхьичIунмунин ккаллину бушиву.
[dropcap]Б[/dropcap]увсунни Лакрал ва Даргиял театрду чIярусса шиннардий уртакьну зий бушиву: кувннал кувнначIансса гастроллу хьуннав, цачIусса проектру хьуннав, личIи-личIисса фестиваллу хьуннав.
Хасавюрт шагьрулий спектакль ккаккан бунни «Спартак» тIисса культуралул къатраву. Бигьалагай кьини духьурчагу, биялсса оьрчIру бавтIун бия. Спектакль къуртал хьуну махъ барчаллагьрай артистуращал суратру ришлай бия.
Ва спектакль ттинин ккаккан бувсса цинявппа шагьрурдай кIира ссятрай нанисса спектакль дуклаки оьрчIал ххал бунни бизар къавхьуну, хъинну гъирарай.
СахIналий хъанахъимур лаласун бюхъайсса ник хъирив най душиврул вихшала дишин дуллай бур жяматраву дуккаврил, литературалул ва театрданул кьимат лавай хъанай бушиврийн.
ДакI дарцIуну учин бюхъанссар, жагьилсса никирал дянив театрданул сий ларай даврил ххуллий Лакрал театрданул мудангу хъуннасса даву дуллай бур куну.
