[dropcap]Н[/dropcap]ажагьсса акъахьунссар Совет билаятрай комсомолданул организациялувух хIала къавхьусса инсан. Билаятрал кьуват цIакь баву мурадрай, хъинну чIярусса давуртту дурссар комсомол организациярттал.
Имара Саидова
Жагьилтурал хъунмасса хIарачатрайну дяъвилия махъсса захIматсса шиннардийсса халкьуннал хозяйство ччаннай дацIан дуллай бивкIссар. Жагьилтурал организациярттур цалчинмину диркIсса Целина гьаз дуллалийни, БАМ, ВАЗ, Камаз буллалисса ва цаймигу давурттаву чялишсса гьурттушинна дуллай.
Цила чIумал райондалул жагьилтурал организациялий каялувшиву дуллай хъунмасса захIмат бивхьуссар Хъусращиял шяравасса Исмяилов ХIажи Мусалавл арснал. Хъусращиял шяраву колхозрал зоотехникну зузисса чIумала ХIажи ца яла хьхьичIунсса ва итххявхсса активист, агитатор икIайссия. Даврил бюхъу-бажар бусса жагьил ччяни итталун агьну, 1962 шинал ивтун ур Лакрал ва Ккуллал районнал цачIусса комсомолданул производственный комитетрал инструкторну.
Тай шиннардий, райондалул комсомолданул комитетрал бюрорал члентурал сипталийн бувну, шяраваллавун занай, комсомолданул кьюкьравун жагьилтал кьамул буллай бивкIссар. ХIажи зузисса ппурттуву комсомолданул кьюкьравун кьамул бувсса жагьилтурая сакин бувну бивкIссар райондалул оьллал фермардайн, яттикъушайн ва цаймигу давурттайн зун гьан буллалисса комсомол бригадартту.
1964 шинал ХIажи Исмяилов ивтссар Ккуллал райондалул комсомолданул райкомрал цалчинма секретарьну. Зий ивкIссар ХIажи мукуна райондалул исполкомрал председательнал хъиривчуну. Цаппара шиннардива ХIажи ивтссар партиялул райкомрал кIилчинма секретарьну. Къуллугърал бурж дакI марцIну ва хьхьичIунсса ккаккиярттайну биттур баврихлу лайкь хьуссар цикссагу хIукуматрал чулухасса наградарттан ва барчаллагьрал чагъардан.
Ванал цанна дуллусса наградарттава яла кьимат лаваймунин ккалли дай Комсомолданун 100 шин шаврин хасну сакин бувсса дунияллул халкьуннал организациялул комитетрал чулухасса «Барчаллагьрал чагъар».
ХIажи Мусалаевич, шиннардил мутталийгу хъамакъабивтссар вил захIмат. ХIакьинусса кьинигу ина кунмасса патриотъталли жула жагьилтурангу эбратну хъанахъисса.
Ина барча уллай, чIа тIий буру вин цIакьсса цIуллушиву.
