[dropcap]Н[/dropcap]оябрьданул 12-нний Дагъусттаннал БакIчи Владимир Васильев гьуртту хьунни видеоконференциялул зумувсса щалагу Аьрасатнал селектор совещаниялий. Му хьунни АьФ-лул ХIукуматрал Председательнал хъиривчу Виталий Муткол каялувшиндаралу.

Бадрижамал Аьлиева
Билаятрал субъектирдал бакIчитуращал Виталий Муткол ххал бивгьунни кIинтнийн хIадур шаврил масъалартту. Мунал дакIнийн бувтунни чIал къархьуну хьунтIисса Аьрасатнал ХIукуматрал батIаврий ва масъала гьарта-гьарзану ххал бигьлантIишиву ва муний гьарманан, дурсса даврил жаваб дулаврицIун, хьхьичIун ласун аьркиншиву билаятрал исполнител властьрал органнал чулухасса кумаг аьркин хъана­хъими масъаларттугу.

БатIаврий хъуннасса къулагъасралун ласлай бия агьалинал къатравун бацIаву дакъана гъилишиву ва ток буллалаврилмур масъала. Аьрасатнал вице-премьернал оьвчаву дунни хьхьичIми шиннардий кунмасса гъалатIру, лях лавгсса кIанттурду тикрал къахьунну зун. КIицI лавгунни агьали щинал щаллу буваймур системалуву чIярусса аварияртту хъанай душиву, мунинсса багьананугу бушиву оборудование ва сеть дух хьуну душаву ва миккува дакIнийн бувтунни укунсса кIанттурдай кумагран бучIан куну сакин бувсса Фонд (Фонд содействия реформированию ЖКХ) бушиву, амма му фондрайн буклакими чан­сса бушиву.

— Фондрайн дурагу 1 млрд. къурушрансса заякартту дуллуну дур. Цал ттигу цинявппагу губернатортурал къулагъас дурну ччива Фондрал арцу агьали гъилишиврул ва щинал щаллу бавриву ишла дуван бюхъайшиврух. Гьашину кIинтнийнсса хIадуршиндаран итадаркьуну дуссар 207,6 миллиард къуруширттал, — увкунни ванал.
Хьунни ихтилатру токрахсса буржирдаягу, ми лахъан аьркиншивриягу.

Совещаниялул хIасиллайн бувну, Владимир Васильевлул кIанттул властьрал каялувчитуращал ва электроэнергиялул, газрал щаллушиндарал ва ЖКХ-лул хозяйствалул каялувчитуращал ххал бивгьунни цаппарасса масъалартту. КIинтнийн хIадур шаврил хасъсса паспортру Дагъусттаннал 10 шагьрулува 2-ннил къалавсун бур – МахIачкъалаллал ва ДагОгнилул. ЦIанасса ппурттуву вай кIивагу шагьрулий дуллай бур Ростехнадзорданул Ккавкказуллайсса управлениялул ялтту бу­ккаврил хIасиллайн бувну ялун лирчусса диялдакъашивуртту, аьйрду духлаган даврил ххуллийсса давуртту. КIинтнийн цукун хIадур хьуну бурив ххал буллалисса ирглийсса ялтту буккаву хьунтIиссар ноябрьданул 18-19-нний.

Ихтилатру бунни «Газ­п­ром газораспределение Дагестан» ООО-лул исполнительный директор Ризван ГъазимахIаммадовлул, «Дагестанская сетевая компания» АО-лул управляющий директор Владимир Сыщиковлул, Дагъус­ттаннал вице-премьер Владимир Лемешкол, ДР-лул промышленностьрал ва энергетикалул министр Сайгидпаша Умахановлул ва чIявусса цайминнал.

— Республикалул штабрал дуллалисса даву гьарцагу кьини чIалан аьркинссар. Хасъсса луртанну ишла дуваншиврул жучIара дуссар чIунгу, арцугу. Гьарцагу къуруш щурун аьркинссар. Агьалиная букIлакIисса гьарцагу аьрзлул ялув бацIан аьркинссар. ЧIявуну бикIай цимурца хIадуршивриясса докладру, амма щаллу къабувсса ма­съаларттуми личIай. ТIалав буллай ура хIакьинуния тинмай ва кIанугу хIисавравун лавсун зузаву. ДакIний битияра жура агьалинал къатраву гъилишиву ва чани бацIаву дакъа бикIаврил ялув жаваб дулайшиву, — увкунни Республикалул БакIчинал.