[dropcap]Л[/dropcap]аргсса нюжмар кьини Дагъусттаннал Художниктурал союзрал выставкартту дувай залдануву хьунни Дагъусттаннал халкьуннал художник,

ПаччахIлугърал премиялул лауреат, скульптор МахIаммад- Аьли Аьлиевлул юбилейран хас дурсса выставка тIитIлатIисса шадлугъ.

---

[dropcap]Ш[/dropcap]адлугъ дачин дурну ия чичу, драматург ва тарихчи Шяпи Казиев. Юбиляр барча уллалисса ихтилат буллай, жяматийсса ва политикийсса ишкка­кку Сиражу­ттин Илиясовлул кIицI лавгунни скульптор хIисаврай МахIаммад-Аьлил цIа республикалий машгьур хьушиву, лакрал эпосравасса виричусса душ ПартIу-ПатIиман гьайкал дувайхту, Узбакисттаннай яхъанахъисса ва Да­гъусттаннайн увкIсса ппурттуву, «Дараччи» клубрал ПартIу-ПатIиман гьайкал дуван­сса конкурс баян бувсса хавар хьуну, гьур­тту хьушиву ва тания мукьах чарвитуя, чария инсантурал симанну ус­ттарну загьир дуллай зий ушиву.
Дагъусттаннал культуралул министрнал хъиривчу Мурад ХIажиевлул кIицI лавгунни Да­гъусттаннал скульптортурал давурттив Аьрасатнал регионнай душиврулгу миннал кьимат гьаз буллалишиву. Бувсуна МахIаммад-Аьлил бувсса чичу Апанни Къапиевлул чарвитул бюст Болгариянаву Плиск тIисса шагьрулий бишинтIишиву чIал къавхьуну.

Лакрал райондалул хъунама Юсуп МахIаммадовлул художникнайх бавхIуна му Лакрал райондалул бусравсса гражданин ушиву хIисаврайсса ятIулсса лента. Бувсуна жагьилсса художниктал гьунардануцIун захIматгу ххира­сса МахIаммад-Аьлия эбрат ларсун зун аьркиншиву.
Дагъусттаннал медициналул университетрал ректор Сулайман Маммаевлул кIицI лавгунни хIакиннал ва художникнал даву инсаннал чурххал гьарцагу базу, анатомия ххуйну кIулну дикIан аьркинсса даву душиву ва инсаннаха лавхьхьуну чария, гипсрая гьайкал, къалип буван хъуннасса усттаршивугу, ссавургу, бюхъу-тяхъагу аьркиншиву. Машгьур­сса художник, «Пять сторон света» школа хIасул бувсса цIанихсса тренер ХIусайн МахIамаевлул кIицI лавгунни МахIаммад- Аьли кунма­сса бюх­ттулсса гьунарданул заллухъру жулва лагма-ялтту, цачIу-чIарав бушиврул пикри мудангу къабикIайшиву ва жува тукунсса инсантурал кьадру буну яхъанан аьркиншиву.
Дагъусттаннал лайкь хьусса художник Амирхан МахIаммадовлул ва жяматийсса ишккакку, чичу, «Родной Дагестан» ккурандалул хъунама ХIабиб Давудовлул «Халкьуннал Виричунал» удостоверениягу, мусил цIукугу буллунни юбилярнан. ХI. Давудовлул кIицI лавгуна Оьруснал драмтеатрданул хьхьичIсса Расул ХIамзатовлул гьайкалданийн ябияйхту, цалагу, цинявнналгу мудан гьайкалданул автор МахIаммад- Аьлил цIа хIурматрай ва барчаллагьрай зумух ласайшиву. Бухардал паччахIлугърал мединститутрал профессор, медициналул элмурдал доктор Мамур АьбдурахIмановлул кIицI лавгуна цува зузисса институтравасса 7 инсан усса делегация гьуртту хъанай бушиву Узбакис­ттаннал лайкь хьусса художникнугу хъанахъисса МахIаммад-Аьлил выставкалий, бувсуна скульптор Узбакисттаннал художествалул академиялул арцул медальданун ва «Дустлик» тIисса сийлийсса ордендалун лайкь хьума ушивруягу цивппа пахрулий бушиву ва ванал цIанил хIурматгу цачIава лахъну бушиву. Ссайгъатран лавсун бувкIсса бухардал чапан-халатгу лаххан увна.

Юбиляр барча уллалисса ихтилатру бувна Дагъус­ттаннал суратру дишай магьирлугърал музейрал директор СалихIат ХIамзатовал, МахIачкъала шагьрулул Мажлисрал хъунама Муртузааьлиев Аьбдулмуслимлул ва цаймигу бусравсса инсантурал. ЧIявусса агьлу бавтIун бия ва кьини залданувун художникнал давурттай тамаша бувангу, ванал гьунарданун лайкьсса кьимат бишлашисса барчаллагьрал махъру учингу. Ца зумату кунма, чIурчIав дуллай бия ва творчествалул аргъираву ушиврийгу, утти­гу ванал канила хIикматсса давур­ттив дуккантIишиврийгу.
ТIайлабацIу баннав вин, чар­ттаву рухI дишайсса ссихIирчий МахIаммад-Аьлий!