Нуруллагьлул кьариртунни хъинбалдарал ва къириятрал нур

Нуруллагь Садикьов

[dropcap]Н[/dropcap]оябрьданул 3-нний шин хъанай дур 1-мур ЦIувкIратусса цIанихсса аьлимчу, физикалул-математикалул элмурдал доктор, профессор,

МахIаммад-Рамазаннул арс Садикьов Нуруллагь дунияллия лавгун. Лавгссия ва 70 шинал юбилей дуван дурусну ца нюжмар лирчIсса чIумал, юбилей дуван хIадур хъанахъисса жяматгу ссукIурайн батIин бувну.


ПатIимат Рамазанова
[dropcap]Б[/dropcap]уттал шяраву арцул медальданущал школагу къуртал бувну, Нуруллагь дуклан увххун ур билаятрал ца яла хьхьи­чIунмур вузравун – Ломоносовлул цIанийсса Москавуллал университетрал физикалул факультетрайн, тиккува къуртал бувну бур аспирантурагу. Зий ивкIун ур тава цIанихсса МГУ-лул кристаллал физикалул кафедралий. 1980 шинал дурур­ччуну дур элмурдал кандидатнал диссертация.

Кулпатращал

Къазахъис­ттаннайнгу ивзун, тих зий унува, аль-Фарабил цIанийсса Къазахънал национал университетраву дурурччуну дур докторнал диссертация. 1985 шиная 2016 шинайн ияннин зий ивкIун ур Ш. Есеновлул цIанийсса технологиярттал ва инжиринграл паччахIлугърал университетраву: цал – хъунама преподавательну, яла – доцентну, кафедралул хъунаману, деканну. Таман­сса шиннардий вава университетрал проректорну зий ивкIун ур. УрчIцIалку шиннардий Актау шагьрулий атомрал электростанциярдай зунсса инженертал- атомщиктал хIадур буллай байбивхьуну бур, ва даврил дайдихьу дурминнавух ивкIссар Нуруллагьгу. ЛичIи-личIисса шиннардий ва зий ивкIссар автоххуллурдал касму лахьхьин дуллалисса ва инженер- механиктал, атомрал- энергетиктал хIадур буллалисса факультетирттал деканну.

Садикьовхъул МахIаммадрамазан, Нуруллагь, МухIуттин,
Шакарханум, Шамхалаев Аьбидин, Халилов Исмяил

Гьаннайсса, биялсса бутIа бивхьу­ссар ванал Къазахъисттаннал жагьилтал ду­ккин бувавриву ва элмулуха зузи бувавриву. 2005 шинал, Къазахъисттаннал кIулшиву дулаврил ва элмулул министерствалул хIасиллайн бувну, Нуруллагьлул цIагу диркIссар Къа­захъисттаннал хьхьичIунми аьлим­­турал ва преподавательтурал сияхIрай. Аьмну педагогнал ва аьлимчунал стаж 40 шин хъанай дур, ванал элмийсса давур­ттив дуркссар кьатIаллил билаятирттай итабакьайсса сийлий­сса журналлай, цалагу цимилагу докладру бувккуссар дунияллул халкьуннал дянивсса элмийсса конференциярттай.

2013-2017 шиннардий зий ивкIссар Мангистау областьрал инновациялул технологиярттал кафедралийгу, квалификация гьаз дувайсса Национал центрданул филиалданийгу. Ванал чIявусса лекциярду бувккуссар магьиршиву гьаз дувансса курсирдайн бувкIсса учительтурахь. Ва лайкь хьуссар «Къазахъис­ттаннал кIулшиву дулаврил отличник», «Къазахъисттаннал кIулшиву дулаврил бусравсса зузала» цIардангу, «Элмулуву­сса хьхьичIуннайшивурттахлу» тIисса хIурматрал лишандалунгу. «Дагъусттан» этнокультуралул центрданул председательнал хъиривчу хIисаврайгу, Къаза­хъисттаннал халкьуннал ЧIавамур ассамблеялул член хIисаврайгу, Мангистау региондалий цашиву, нахIушиву дуруччавривугу Нуруллагьлул саламатсса бутIа бивхьуссар. «Нуруллагь Актаулийн увкIуна 1981 шинал, на 1969 шинала тих мина дирхьуну ура, — тIий, ва дакIнийн утлай ур ЦIувкIуллал Ветерантурал советрал хъунама Аьбидов Сулайман. — Цала кIулшивурттайну, итххяххаврийну, тIул-тIабиаьтрайну, мяърипатрайну гьаз хьуна.

Элмулуха зузиминнангу гассят ванай я бавцIуна. РекторатрачIа хIурматрай икIайва, гьар шинах университетравун кьамул бувай комиссиялул хъунаману итайва. Ванал хIарачатрайну ва сипталийнуя тих Дагъусттаннал Культуралул центргу хIасул хьусса. Шагьрулул собраниялул депутатну увчIуссия цимилагу. Алма-Аталия, Дагъусттанная министерствардая бувкIсса къуллугъчитал ванал хъамалъя, Дагъусттаннаясса делегацияр­ттугу вайннал ужагърай ликкай­ссия. Дагъусттаннай уччирчагу, Актаулийгу бивкIссар ванахсса ссукIур тIивтIуну. Нуруллагьлул арс Максим Актаулий яхъанай уссар. Утти, Бакуйхчил хьуну, чIявусса хъамал, даврил уртакьтал, вихшаласса дустал Къаза­хъисттаннаягу най бусса бур ванал шинайн».

Нуруллагьлул ва ванал кулпатрал Аминатлул, вайннал наслулул тачIав хIура ду­ккан къариртссар Дагъусттаннащалсса арарду. Актаулий ичIува вайннанний ишлану бивкIун бур шанма маз: оьрус, къазах ва ла­кку мазру.
Нуруллагьлул ва Аминатлул ччаврил хаваргу балладалуву кунмасса бур. Вайннал оьрмугу бувтун бур цаннал ссихI цаннан нахIуну. Нуруллагь цувава гьарцаннащал хIалимну бакъа ихтилат къабувайсса, ссавур дусса, адаврай оьрму бутлатисса инсан ия. Укунми дунияллия лагайхту, личIай вайннал яхI-къириятрал, хъинбалдарал нур. Кьариртунни Нуруллагьлулгу аьрщарай хъинбалдарал ва къириятрал нур.