Ноябрьданул 4-нний, Аьрасатнал халкьуннал Цашиврул кьинилул шадлугъирттал лагрулий, республикалул арулва муниципалитетран, миннувух ЦIуссалакрал райондалунгу,
буллунни уттизаманнул тIалавшиндарайну щаллу бувсса, мобильнайсса культуралул центрду – автоклубру.
Бадрижамал Аьлиева
МахIачкъалалив, Оьруснал театрданул хьхьичIсса майданнив, хьуна ва кьини ми машинарттал кIулли заллухъруннахьхьун дуллалисса шадлугърайсса батIаву. Муниципалитетирттал бакIчитал ва культуралул зузалт барча буллалисса махъру лавхъуна ДР-лул ХIукуматрал Председательнал цалчинсса хъиривчу Анатолий Карибовлул, ДР-лул Халкьуннал Мажлисрал председательнал цалчинсса хъиривчу Елена Ельниковал ва ДР-лул культуралул министр Зарема Буттаевал.
Цалва ихтилатраву Анатолий Карибовлул кIицI лавгуна «Культура» тIисса национал проектрал лагрулий буллалисса автоклубирттал культуралул зузалтрал давриву итталун дагьансса бигьашиву, куклушинна дувантIишиву, ва иш артистътурал ва тамашачитурал дакIру ххари хьунсса иш бушиву.
ЦIусса техника диянтIиссар Къаяккантуллал, Къизилюртуллал, Къизлардал, Лаващиял, ЦIуссалакрал, Нугъайнал ва Тарумовкаллал районнайн.
Ца-кIива махъ автоклубирттая цаятувагу. Вай бур ччимур кIанай культуралул шадлугъ сакин дуван бюхъайсса, уттизаманнул техникалул щаллусса машинартту. Автоклубрая концертрал майдан, сахIна буван бюхълай бур бигьанма, вайннуву дур мунин чара бакъа аьркинсса чани, чIурду щаллу бувансса ва видеолул кьай-кьуй.
Нигьирттайсса культуралул къатлуя мукунма бюхълай бур кинозал бувангу. Автоклубру щаллуну бур дизель-генератордалгу, мукунна бюхъантIий бур личIи-личIисса культуралул шадлугъирттая тIайланнасса эфирду – онлайн-трансляцияртту дуллангу.
Национал проектрал пландалийн бувну 2024-ку шинайннин Аьрасатнал 74 региондалун булунтIий бур 600 автоклуб. Сайки 2 азаруннийн бивсса муниципалитетран ца бухьурчагу автоклуб булун аьркинссар. Ва шинал ахирданийннин билаятрал 21 региондалийн цинявппагу 100 автоклуб биянтIиссар. Программа щаллу дуван итабавкьуну бур 3 миллиард къурушрал.
