[dropcap]М[/dropcap]ахIачкъалалив Поэзиялул театрдануву хьунни художник МахIаммад Къажлаевлул выставка. Проект хIадур дурну дия Поэзиялул театрданул МахIачкъала шагьрулул тарихрал музейращал цачIуну.

Бадрижамал Аьлиева
Выставка тIитIлатIисса шадлугърал дайдихьу дуруна Поэзиялул театрданул директор Елена Гьаруновал. Цилва ихтилатраву ванил кIицI лавгуна художникнал гьарцагу выставка дунияллий, жула лагма-ялтту хъана­хъимунихсса цIусса ургаву хъана­хъишиву.

[dropcap]М[/dropcap]ахIачкъала шагьрулул тарихрал музейрал директор Зарема Дадаевал бувсуна художникнал оьрмулия ва творчествалия, кIицI лавгуна хIакьинусса выставка республикалул культуралул оьр­мулуву хъана­хъисса агьамсса иш бушиву.
Ихтилатру ялагу бувна художниктал Ибрагьим-Халил Ссупияновлул, Апанни МахIаммадовлул, искусствовед Татьяна Петенинал, Республикалул Ветерантурал совет­рал председатель, ДР-лул Жяматийсса палаталул член МахIарам Аьлиджановлул.

МахIаммад Къажлаевлул гъанчунал чулуха махъ лавхъуна Да­гъусттаннал Аграр университетрал муаьллим Аслан Къажлаевлул.
— МахIаммадлул дирхьусса суратирттал ттун зувиваксса процент кIулну бухьунссар, МахIаммад цуварив инсан хIисаврай ттун ттуршвагу процентрал кIулли, ца яла марцIсса, тIайласса, цумусса инсанну. Чичу, шаэр Курзи ва музейрал директор Давуд Къажлаевхъал кулпатраву цамур куццуй­сса оьрчI ляхъангу къабюхъай­ссия, — увкуна ванал. КIицI лавгуна МахIаммад ушиву цалла суратирттайну инсантурал дакIурдичIан ххуллу буклакисса художник.

Ахирданий махъ буллуна художникнахьхьун цахьхьунмагу. МахIаммадлул бувсуна выставкалийсса цаппарасса давуртту чичаврил тарихрая, бакIщаращая.

Увну ур МахIаммад Къажлаев 1946 шинал Гъумук, къуртал бувну бур Дагъусттаннал художествалул училище ва Москавуллал полиграфиялул институт. 1971-ку шиная шиннай хьуну дур цайми художниктал гьурттусса ва цалалу­сса цимирагу выставка. МахIаммад Къажлаев зий ивкIссар Дагъус­ттаннал ва Москавуллал областьрал художествалул фондирттал системалий, да­сру дихьлай ивкIссар оьрчIал изостудиялий.
Ялапар хъанай ва зий ур художник жулва билаятрал кIива шагьрулий – МахIачкъалалив ва Москавлив.

Выставка лахъи лагантIиссар ноябрьданул 29-нин.