Граждан дяъвилул лама жулва зунттавух бищун нанисса чIумал, ГьунчIукьатIрал ЯтIул партизантурал кьюкьлул къучагъшиву ккаккан дурссар цалла миналийн
ххявхсса Деникиннул, ХIуцциннал Нажмуттиннул, туркнал аьралуннал хьхьичI.
Амин Аьбдуллаев
Та чIумал дяъвилийн гьанминнан кIуну бутайсса бивкIун бур. Ца мукун чIявуну кIуну багьайсса ятIул партизан Шабанов Шяъваннуя ца-кIива зат бусан ччай бур буккултрахь, балики, бюхъайхха, ва Шяъван кунма хъама бивтсса цайми шяраваллавугу лякъин тIисса пикрилий.
Аьлил арс Шабанов Шяъван увну ур 1900 шинал ГьунчIукьатIув. Оьрмулул 13 шинаву ванан чагуртну Кутаисуллал шагьрулийн гьан багьну бур. Тикку 2-3 шин дурну дур зий. Шяъван Кутаислив уна, байбивхьуну бур Цалчинсса дунияллул дяъви. Кутаис шагьру оьруснал аьралуннал бувцIуну бикIайва тIар.
Цал, усттарталгу кьатIувппай бувккун, чагуртътал цивппалу дуссукъатлуву бунува, увкIун шама оьрус саллатI, чагуртътурайнгу гьужум бувну, гива ххаржан, тур, чал хьхьури ларсун лавгун бур. Усттартал бувкIукун, лавгун, тай саллатIнал хъунамагу лявкъуну, аьрза бувну бур. Командирналгу, бавтIун саллатIтал, майданнив бацIан бувну, ккаккан бара куну бур зува щил хъямала бувссарув. Чагурт буруглай, буруглайгу бивкIун, кувннаха кув лавхьхьуну оьруснал симанну личIи дан къархьуну, лавгун бур.
1917 шинал хIукумат даххана хъанан диркIукун, зана хьуну ур Шяъван ГьунчIукьатIув. Оьрмулул 19 шин барткъаларгун, 1919 шинал Деникиннул къазахънащал талан лавгун ур Шяъвангу. Тай граждан дяъвилул шиннардий цува гьуртту хьуну ккавкмуния Шяъваннул бусайва. Дяъвилийн партизантуращал ачин кIуну чIявуну партизан ХIасан-ХIусайннун, Къуннахъал Кьуранмадлун ва цан буккайва тIар. Ванал гьурттушинна дурну дур Аья-Кьакьалуву хьусса талатавривугу, Жунгутайлийгу, яла махъ ХIуцциннал Нажмуттиннул аьрал гьунчIукьатIрайн ххявхсса чIумалгу.
Шяъваннул 1921 шинал бувцуну бур щарну цала ссурахъу Ссарай. Муния махъ мунал 1-2 шин Гъумук милицану зий дурну дур. Ва инсаннал пиша бакъар увкуну, кьабивтун бур милицанал къуллугъ. Мичча Шяъван, Ссарайгу бувцуну, Краснодардал чIаравсса Пашковск тIисса станицалийн лавгун ур къалайчишиву дуллан. Мукьра шинавату Саратоврайн лавгун, тиккугу 2 шин дурну, яла Свердловскалийн лавгун ур. Свердловскалий укунсса ишгу хьуну бур Шяъваннул дуссукъатлуву. Ца кьини, чIявуну ваначIан даврийн учIайсса ххуйсса гьалмахчу, оьрус увкIун уна, Шяъваннул лавсун кказит, ххябувккун, танмакулул пIапIрус дархIуну дур. Ганал хьхьичI щяивкIсса оьрус цIирх ивкIун, яру кьатIув личавай урувгун ур. Яла: «Да это же наш, это же наш…», — куну, ливхъун лавгун, ххишала тачIав къаувххун ур ваначIан. Ургарчан, Шяъваннул къалиян бавхIуну бивкIун бур Сталиннул сурат дусса чагъарданий.
1934 шинал Шяъван цала кулпатращал зана хьуну ур ГьунчIукьатIув чIивима уссин МахIаммадлун щарсса дуцин. Ванал, цала буттал Аьлил цIания фамилиягу дурну, Аьлиев дирхьуну диркIун дур. Яла махъ бавчуну бур ай фамилия буттал буттахъал цIанийри дишайсса тIий. Шяъваннулгу, буттал буттан Шяъван диркIун духьукун, Шабанов дурну дур. ЦIусса бакIрал чагъар баннин цаппара шиннардий колхозраву зун багьну бур. Яла, туну, дяъви байбивхьуну, Свердловскалийнгу зана хьунсса сант къархьуну, шяравува ливчIун ур.
Шяъваннул дяъвилул шиннардия шиннай 25 шин хьуссар жяматрал оьллу канаки буллай. Му цувагу хъинну авкьусса, хIалимсса, щинчIав къаччан бикIансса махъ къаучайсса инсан ия. КIюрххил чаннащал лавгун, маркIачIанай зана шайва. Инт дайдирхьуну, апрель-майрай гъаттара канаки байва КIулушав, Тталлув, Аруссив, Массуссулув, Лекьавурттай, Чапур-Гьанав, Пуннав, Ахъуву, МучIув. Май зурул ахирданий бачин байва гъаттара КIямашрал шяравух зунттайн, — ОьбакIуйн, Залттавун, Хъахъияв. КIюрххил лавай, кьунниялай ялавай занай, чарттавух, кьунттавух Шяъваннул гьантлун 20-30 км. ритайхьунссия. КIинттул, гъаттара вивппай лавкьусса чIумал, ва лагайва неххамачIувсса «скотдворданийн», хьхьувай – къарал буллан. КIюрххил къаралдания зана хьуну махъ, кIюрххилссагу дуркуну, авлий лагайва. Авлиятугу ахттая махъ зана шайва бюрх, къахъну бувтун. Ялагу цала къаралданин ачайва. Ванал игьалагаву къадикIайва, тIаннул-чарилъяв кIул уван къашайва. Дяъвилул чIумал окопру, каналлу дуклангу лавгуна. Мунан бувсса захIматрах дуллусса кIира медальгу дия: «За оборону Кавказа» ва «За трудовую доблесть».
Шяъван аьпалухьхьун гьан хьхьичI 5-6 шинай цала къатрачIан гъансса Къикъавалу тIисса кIанттай дучрах уруглай икIайссия. Шяъван ва Ссарай, аьпа бан цал, хъинну бавкьусса, иминсса лас ва щар бия. Вайннал 4 оьрчI бия – 2 арс, 2 душ. КIиягу арс, Шабанов Даниял ва МахIаммадрасул, цала кулпатирттащал Москавлив ялапар хъанай бур. Хъунмамур душ Шамсинур аьпалухьхьун лавгунни, чIивимур Назима цила адиминащал, Аразов Аьлищал, ГьунчIукьатIрал къутандалий ялапар хъанай бур. Хъинну хъунмасса захIмат бивхьусса, даччин дакъасса къуш бия Шяъваннул къуш.
Вана укунсса захIматрал агьулданий дикIайва дарцIуну таний колхоз-совхозру ва Совет хIукумат.
