[dropcap]О[/dropcap]ктябрь зурул 25-нний, Совет Союзрал кIийла Виричу АхIмад-Хан Султан увсса кьини, МахIачкъалаливсса Виричунал гьайкалданучIан бавтIун бия агьали, жула ххаллилсса арснал гьунарданул кьадру лахъну ябуллалими.

П. Рамазанова
Гьар шинах ва увсса кьинигу, Ххувшаврил кьинигу гьайкалдануцI тIутIив дишин батIайсса аьдат ччянира цIакь хьуну дур. Мяйжан­ссар, увсса кьини Ххувшаврил кьини кунма чIявусса къабатIай. «ЯлунчIил Виричунан 100 шин хъанахъиссар, ва дата лайкьсса даражалий хьунадакьин уттива хIадур хъанан аьркинссару жува. АхIмад-Хан Султаннул чувшиврул ва гьунарданул кьимат шиннардил лахъишиврий хьхьара къахьунтIиссар, ярг хъанарча ба­къасса», — увкунни тIутIив дишин увкIсса 1- мур ЦIувкIратусса профессор, академик АьвдурахIман Халиловлул.

Вара кьини АхIмад-Хан Султаннул цIанийсса МахIач­къалаллал аэропортрайсса Виричунал гьайкалдануцIгу тIутIив дирхьунни жула лакрал патриот, публицист Алексей ХIажиев хIаласса аэропортрал зузалтралгу.

---

Хияллал хъару
АхIмад-Хан Султаннун
Ниттил увни, цIурттайн
Я щухьунссия,
Барзу куна лехлан
Кьаст хьухьунссия.
Ссавруннайн тIитIлай тIий,
Леххан ччай, кару,
Хьуна вил хъачIунттай
Хияллал хъару.

Бюхъулул гьаз увни
Бюхттул цIурттачIан,
Винма лайкьсса цIукуй
Мина данна тIий,
Вин багьуна талан
Душмантуращал,
Кьаст лархIуну бувкIсса,
Жува лагъарт бан.

Буттал кIанттул цIаний
Талай бивкIминнал
ХьхьичIмур кьюкьлуву дур,
АхIмад-Хан, вил цIа.
Виричушиврул цIа
КIийлла лайкь дурсса
Жул буттал аьрщарай
Инара усса.

Чансса бакъар жула
Буттал аьрщарай
Виртталшиврул цIуртти
Ссавруннай лавхъсса:
КIия буллай чани
ЦIусса никиран,
Гай вирттаврал ххуллийх
Бувцун нанисса.

Ина кIай цIурттаву
Яргсса цIукура,
Ина жул пахрулул
Бюхттул гьайкалла.
Никиран чувшиврул
Эбратну хьусса,
Жул дакIурдил гужгу
Вивури бусса.

Ссугъури Увайсов