Дагъусттаннал модельернал, чиваркIуннал янналул дизайнер, Шамхал Аьлихановлул коллекциялий тамаша бунни Москавлив Модалул нюжмарданийн бавтIцириннал.
Ва модалия хавар буминнан кIулссар ва Аьрасатнавусса сийлийсса мероприятия душиву.
П. Рамазанова
[dropcap]С[/dropcap]оциал сетирдай ванал коллекциялун лахъсса кьимат бишлашисса комментарияртту дур, кувнначIан кув гьан дуллай бур дагъусттаннал орнаментру (бартбисурттайсса накьичру, къайтагъуллал гулавати).
Шамхаллул цала бусаврийн бувну, республикалул кьатIув цалчин ванал коллекция ккаккан бувну бур Пятигорскалий, 90-ку шиннардий. Москавливсса Модалул мероприятиялий гьуртту хьун ванан кабакьу бувну бур Дагъусттаннал БакIчи В. Васильевлул ва Москавливсса Дагъусттаннал вакил Жамалуттин ХIасановлул.
— Хъуннасса производство хIасул дувансса пикри бур, экспериментал лабораториягу, лахьхьин бувай классгу бусса, Художествалул училище къуртал бувминнайн зун оьвчавансса. Туризм сантирай ва лябукку буну хьхьичIуннай хъанахъиссаксса, Дагъусттаннай этникалул элементру дусса лаххиягу тIалавну дикIантIиссар, туристътуран мукунсса журалул лаххия машан ласун ччантIиссар. Ва ялагу, зузи кIанттугу ххи хьунтIиссар, жагьилтурангу дарзитурал, модельертурал даву лахьхьин дуллансса сантгу дагьантIиссар, — тIий ур Шамхал.
Ванал бувсунни Дагъусттаннал БакIчинангу дурурххушиву этникалул накьич дусса пиджак ва ккуртту. Аьрасатнал чIявуми модельертал зий бусса бур билаятрал кьатIув. Шамхалма МахIачкъалалив дурухлай ур, ванал планну чIярур, ссутнил-кIинтнил коллекциялущал ялунчIингу Москавливсса мероприятиялий гьуртту хьун дакIний ур. МахIачкъалалив салон тIитIин ччай ур, заказру кьамул дуллалаврицIун, дурурххуну хIадурнасса яннагу дахлахисса, муштаринаща, ччикунсса янна язи дургьуну, машан ласун хьуншиврул. Хъунмур къулагъасгу ванал ххал-ххалаххул давриву, гьай-гьай, дур этникалул элементирттах. Гьамин, миннулли дагъусттаннал миллатирттал лаххия исвагьи дуллалисса тIий ур ва.
