[dropcap]Н[/dropcap]оябрь зурул 8-нний щалагу Аьрасатнаву кIицI лагай къуллугърал бурж биттур буллай жанну дуллусса виваллил иширттал органнал зузалт ва аьралитал дакIнийн бичлачисса кьини.
Ва кьини цIакь дурссар 2011 шинал Аьрасатнал Виваллил иширттал министерствалул хIукмулийну.
А. Аьбдуллаева
Дагъусттаннал БакIчи Владимир Васильев гьуртту хьунни аьпалухьхьун лавгми дакIнийн бичлачисса мажлисрай. Ванал дирхьунни тIутIив къуллугърал бурж биттур буллай жанну дуллуминнан Республикалул Виваллил иширттал министерствалул къатрал хьхьичI дацIан дурсса гьайкалдануцI.
Аьпалул мажлисрай мукунма гьуртту хьунни ДР-лул ХIукуматрал Председательнал хъиривчу Рамазан ЖахIпаров, ДР-лул виваллил иширттал министр Аьбдурашид МахIаммадов, Дагъусттаннал Росгвардиялул управлениялул хъунама МахIаммад Баачилов ва цаймигу къуллугъчитал. МВД-лул зузалтрал ва дуклаки оьрчIал майданнив бивхьуну бия лавхъсса майлул чирахъру. МинутIрайсса пахъ багьаву дурну махъ дуклаки оьрчIал итабавкьунни гьаваллавун, «Ххирассару», «ДакIнийссару», «Къуману буссару» тIисса махъру чивчусса чагъардащалсса кIяласса шарду.
Вара кьини Владимир Васильевлул, Аьбдурашид МахIаммадовлул ва МахIаммад Баачиловлул тIутIив дирхьунни Каспийскаллал ОМОН-лул хIаятраву дацIан дурсса гьайкалдануцIгу.
