Ноябрьданул 21-нний «Дагестан» РИА-лий ноябрьданул 30-нний Яру­ссаннал театрдануву хьунтIисса «Мой бизнес» тIисса форумран хасъсса пресс-конференция хьунни. Журналистурахь форумрая аьмнугу,

республикалул хIакьинусса бизнесрал тагьарданиягу, бизнес щурущи дансса лябуккусса чаранну ляхълай бушивриягу бусан бувкIун бия ДР-лул ХIукуматрал Председательнал цалчинма хъиривчу ХIажимахIаммад ХIусайнов, ДР-лул ишбажаранчишиврул ва инвестициярттал Агентствалул каялувчи ХIажи ХIасанов, «Синергия» бизнесрал ишир­ттал университетрал вице-президент Юрий Мурадов.

---

З.АьбдурахIманова
Форум республикалий нантIиссар ца кьинилул мутталий. Ва хъанахъиссар щала билаятрай щурущи дурсса «Ишбажаранчишиву машгьур даву» тIисса федерал программалул лагрулий буллали­сса форум.
Республикалул ишбажаранчитурахь хIакьину дунияллул бизнесраву хъана­хъисса дахханашивурттая ва яла микку ишласса механизмардая бусан форумрайн оьвкуну бур цIаларгсса маркетолог Игорь Маннуйн, инвестор, ишбажаранчи Владимир Турманнуйн, АьФ-лул Виричу, летчик-космонавт Сергей Рязанскийн, бизнес-консультант ва бизнес-тренер Дмитрий Ащепковлуйн ва цайминнайн.

ХIажимахIаммад ХIусайновлул кIицI лавгуна укунсса журалул форум­ру, батIа­вуртту ва семинар-дарсру жула республикалул ишбажаранчитуран хIакьину чара бакъа аьркинну душиву, марцIсса, тIайласса бизнесрал гьану бизаншиврул хасъсса ишбажаранчишиврул кIулшивурттугу дикIан аьркиншиву ва хIакьину республикалул властьрал хъуннасса даву дайдирхьуну душиву 20-25 шинал мутталий хIукуматрал ва ишбажаранчишиврул дянив къадиркIсса вихшала цIакь дуллай.
— ХIакьинунингу хъуннасса даву дур­ссар, республикалул ишбажаранчишиву «ххютула» дуккан дуллай. ХIисав бувну, цIана Дагъусттаннай сайки 70 азарунниха ливчусса ишбажаранчи уссар, налогругу дуллай, тIайласса ва марцIсса бизнесраха зий. Ва махъсса дачIи шиналгу азараксса инсан налограл сияхIрайн лавсун уссар. ХIасил, чан-чанну тIий, властьрал ва бизнесрал дянивсса ламурду цIакь хъанай бу­ссар, — увкунни вице-премьернал.

ХIажи ХIасановлул бувсунни журналистътурахь МахIачкъалалив декабрьданул байбихьулий «Мой бизнес» тIисса Центр тIитIлатIишиву, микку бизнес щурущи дан ччиминнангу, нирхиравун дагьсса бизнес дунангу ххуйсса кумаг буллантIисса консультантътал, личIи-личIисса пишакартал зунтIишиву.

Юрий Мурадовлулгу кIицI бувна федерал программалул лагрулий буллалисса укунсса журалул форумру шинал ахирданийнин щала Аьрасатнаву 26 бантIишиву ва Дагъусттаннай бизнес щурущи дуван циняр шартIру дузалну душиву.

«Дагъусттаннал агьали дахху-ласулуву хъинну итххявхсса, за бувчIайсса, цIу-цIусса идеярттал хъирив багьсса агьали бур. Гьарцагу чIири-хъунсса бизнес – му хьхьичIва-хьхьичI агьалинан зунсса кIанттурдур, яла – миннал хIал-ахIвалатри. ХIукуматралгу мурад, бизнесрацIун кабавкьуну, агьали рязи бансса, миннал буру­ккинну щаллу бан­ссар, — увкунни ванал.
Форумрай гьуртту хьун ва муния гьар­та-гьарзану кIул бан ччинан вайннал сайтрая мюнпат хьунтIиссар: https://мойбизнес.рф/events/mahachkala