Ухлаган унни «шанаши ячейкардавусса» урчIа

Жуятура нанисса шинал лажиндарай хасъсса къуллугърал зузалтрал ухлаган унни Дагъусттаннай «шанаши ячейкардавасса» урчIа инсан.

Ва хавар бувсунни ДР-лул Экстремизмалийн къарши бацIаврил центрданул каялувчи МахIаммад Сайпуллаевлул Дагъусттаннал МВД-лул Жяматийсса советрал член МахIач Вердиевлущалсса ихтилатраву.


Андриана Аьбдуллаева
МахIаммад Сайпуллаевлул кIицI лавгунни Дагъусттаннай хIакьинусса кьининин чан хьушиву экстремизмалуцIун ва терроризмалуцIун дархIусса тахсиркаршивуртту.
— Шин дайдирхьуния шиннай Дагъусттаннай 400-нния лирчусса терроризмалул ва экстремизмалул журалул тахсиркаршивуртту хьуну дур (386 – терроризмалуцIун дархIусса, 37 – экстремизмалуцIун). Ва чIумул дянив ярагъ кIунттихьну органнал зузалтрайн данди бавцIуну тIий бат увну ур 9 инсан. Ларгсса шинал бат увссия 29. Миннаву буссия полициялул зузалт оьрмурдацIа бан кьаст лархIуну бивкIссагу, — кунни МахIаммад Сайпуллаевлул. Ванал бусласимунийн бувну, жагьилтал вай иширттавун кIункIу буллай бур «Щалагу дунияллул паутиналийхчIин».
— Экстремизмалул ва терроризмалул идеологиялул чул бувгьуминнал сакин дуллай бур личIи-личIисса сайтру ва социал лажинтру, цавугу ппив буллалисса жяматран нигьачIаву дусса пикрирду, хIукуматрайн къарши­сса публикацияртту.ЧIярусса ккуранну дур WhatsApp-ву, telegram-раву ва цаймигу приложениярттаву радикал исламрал чул бувгьуми цачIун хъанахъисса. Ва гава наркомания кунмасса иш бур: азар дирма цамагу кIункIу уллай ур. Инфекция кунна, цанная цаннайн диллай дур. Гьарца экстремизмалул идеологиялул чул бувгьуманал хIарачат бур цала чулийн цаппара цаймигу кIункIу бан. Укун хIасул хъанай дур «шанаши ячейкарду», — тIий буслай ур Сайпуллаев.
Экстремизмалийн къарши бацIаврил центрданул зузалтрал мукунсса инсантал цукун кIул байссарив соцсетирдаву ва экстремистурал идеологиялийн къарши бацIан ци чаран ляхълай буссарив буслай, Сайпуллаевлул увкунни: «ЖучIа щаллу­сса отдел зий дуссар, интернетравусса тахсиркартал ашкара баву мурадрай. Ва хъинну захIматсса даву дур, цанчирча жяматран нигьачIаву дусса группарду ягу личIисса аккаунт­ру соцсетирдаву ялу-ялун чIяру хъанай дур. Амма жуща бюхълай бур, хъирив бавцIуну, ми бусса кIанттурду кIул бувну, бугьан.
Центрданул хъунаманал мукунма бувсунни хIакьинусса кьини республикалул гьарица ВУЗ-цIун ва ССУЗ-цIун цIакь бувну бушиву цала зузалтраясса хасъсса группа. Гьарица группалул каялувчигу хъанай ур региондалул МВД-лул управлениялул хъунама.
Даврил хIасиллая Центрданул зузалтрал буслай бур цал группалул хъунаманахь, яла миннал докладирттах вичIи дихьлай ур Дагъусттаннал виваллил иширттал министр Аьвдурашид МахIаммадов.
МахIач Вердиевлул кIицI лавгунни МВД-лул Жяматийсса советрал цащава шайсса кумаг буллантIишиву ва давриву Центрданун.
Лажин хIадур дурссар
А. Аьбдуллаевал