«Сахаватсса Тталаткьини» (#ЩедрыйВторник) тIисса цIанилусса ихIсандалул суккушинна сакин дурну дур 2016 шинал ва мунил къяртри
ппив хьуну дур дунияллул 100 билаятрайх. Гьашинумур акция хьунтIиссар декабрьданул 3-нний.
Бадрижамал АьлиевА
Аьрасатнаву му акциялул сакиншинначину дур филантропия хьхьичIуннай даврил «КАФ» тIисса цIанилусса ихIсаниятрал фонд. Акция дуллалиссар АьФ-лул Экономикалул министерствалул, Президентнал грантирттал Фондрал, Москав шагьрулул жяматийсса комитетрал, «Циняв цачIуну» тIисса мажлисрал, Фандрайзертурал ассоциациялул, Донортурал фондрал, «Благосфера» АНО-рал ва Социал информациялул агентствалул кабакьаврийну.
Ва суккушиндарал агьаммур мурадну бур ихIсаниятрал культура хьхьичIуннай даву, хъин-хъинсса давурттавух шайссаксса чIявусса инсантал хIала бизан баву. Ва сипталул давривух гьуртту хьун бюхъайссар политикалул дакъасса ччимур организациялуща ва таксса инсаннаща.
2016-2018-ку шиннардий ва акциялий гьуртту хьуну дур жула билаятрал личIи-личIисса регионнаясса 2700-нния лирчусса организацияртту, Калининградрая Камчаткалийн дияннин дурну дур ихIсаниятрал 500-нния лирчусса давуртту.
«КАФ» цIанилусса ихIсаниятрал фонд оьвтIий дур Сахаватсса Тталаткьинул сипталувух гьуртту хьун, щаллагу дунияллий миллионная ливчусса инсантурал дуллалисса ихIсаниятрал давурттавух хIала буххан.
Гьуртту хьун ччиминнан аьркинссар: www.щедрыйвторник.р.ф сайтрай уртакь хIисаврайсса регистрация дуван; ва сипталул логотип ва жура ихIсаниятрал давурттаву ишла буван; 2019-ку шинал ноябрьданул 19-нния декабрьданул 4-ннийн бияннин дуван ихIсаниятрал зумунусса ци-дунугу даву (волонтер акция, грант, цала хушрай хъиншивуртту дуллалиминнан бахшишру дулаву ва м.ц.); цалла дуван нанисса (анонс хIисаврай) ва дурсса ихIсаниятрал даврия цала сайтрай ягу цала соцсетьрал лажинтирттай чичаву, мукунна ва сипталул сакиншинначитурахьгу дуван дакIнийсса даврия бусаву, миннал www.щедрыйвторник.рф сайтрай чичиншиврул.
«КАФ» фондрал цила цинявппагу уртакьтуран каши дуллай бур цила сайтрай регистрация дувансса, му сипталул стиль ва логотип ишла дувансса, му сипталул лагрулий дурсса давурттал анонс дуллансса.
Ва даврия цIухху-бусу буван бюхъайссар ва номерданийн оьвкуну:
8(495)989-41-00; givingtuesday@cafrussia.ru skornacheva@cafrussia.ru
Ца-кIива махъ «КАФ» фондраягу. Ва хъанай дур Аьрасатнаву зузисса ихIсаниятрал фондирттаву ца яла хьхьичIарамур ва хьхьичIунмур. Фонд уртакьну зий дуссар, ихIсаниятрал программарду щаллу дуллай, Аьрасатнавусса, дазул кьатIувсса компаниярттащал ва частный фондирттащал. 2016-ку шиная шиннай ва фонд хъанахъиссар дунияллул халкьуннал дянивсса #ЩедрыйВторник ихIсаниятрал координаторгу. Фондрая гьарта-гьарзану кIул хьун бюхъантIиссар www.cafrussia.ru сайтрай.
