КьурбанмахIаммалул арс ХIусманов ХIадис
Вай гьантрай, хар-хавар бакъа къюкI дарцIуну, лавгунни дунияллия 1-мур ЦIувкIратусса ххаллилсса зунтталчу, жяматран ххирасса инсан, КьурбанмахIаммалул арс ХIусманов ХIадис.
Увну ур ва 1958 шинал ЦIувкIрав, кIиккува школа къуртал бувну махъ армиягу лавхъун, зий ивкIун ур МахIачкъалалив радиозаводрай. Спортрал иширттаву итххявхсса, захIмат ххирасса ва архIал зузиминнавугу хIурматрай уссия. Махъсса шиннардий муххал ххуллул даврий зий уссия. ЧIярусса шиннардийсса захIматрахлу ХIурматрал грамотардан ва бахшиширттан лайкь хьуссия. Ва ия ххишала акъа дакI-аьмал хъинсса, халкьуннащал хIал бавкьусса, уздансса чув. Шанма оьрчIгу, лайкьну тарбиягу бувну, чивун буккан бувссия. ХIадислул ва ТIутIил кулпат шяраваллил агьулданунгу, кIулцириннангу эбратрансса кулпатри, цаннаха ца хIурматрайсса лас-щар хIисаврайгу. ДакIнихтунусса кьурчIишиву кIидачIлай, жижара буллай буру ХIадислул кулпатрахь ТIутIихь, оьрчIахь, ниттихь Сагъиратлухь, уссурваврахь АьбдурахIманнухь ва МахIаммадлухь, ссурваврахь, цинявгу гъан-маччацириннахь.
ХIадислул рухI хъинний дишиннав, алжаннул ххари уваннав, ванан къабуллумур оьрмулул бутIа наслулун ххибувну лякъиннав!
1-мур ЦIувкIуллал жямат
РАШИДЛУЛ АРС БИРГЬУЗОВ ХIАСАН
ЗахIматсса цIуцIаврища ххассал ан къавхьуну, аьпалухьхьун лавгунни ххаллилсса зунтталчу Биргьузов ХIасан Рашидлул арс.
ХIасан увну ур 1940 шинал Кьубиял шяраву. Увния махъ ниттищал ивзун ур ЦIуликъяннал шяравун. Бархъаллал дянивмур даражалул школа къуртал бувну махъ лавгун армиялийн, шанна шинай къуллугъ буллай ивкIун ур Германнаву. Зана хьуну мукьах дуклай ивкIун ур Дагъусттаннал университетраву химиялул факультетрай.
ХIасан зий ивкIссар учительну, МахIачкъалалив личIи-личIисса давурттай: мастерну, участокрал хъунаману, домоуправлениялул хъунама инженерну. Чув зурчангу, архIал зузиминнал дянив хъинну хIурматрай икIайва, цалла давугу хъинну усттарну, сантирай дайва.
Цала кулпатран ххаллилсса ласгу, цаятува лявхъунан хъинсса ппугу, хъунттаттагу уссия ХIасан. Ванан хъинну ххирая цала Кьубиял ва ЦIуликъяннал жяматгу.
Аьпа бан цал, ХIасангу, мунал нину Уммукусумгу кIирагу шяраваллил халкьуннал цалвану ккалли байва.
ХIасаннул кулпатрахь, оьрчIахь, душнихь ва гъан-маччацириннахь кIидачIлай буру хъуннасса кьурчIишиву. ХIасаннул бунагьирттал аьпа баннав, гьав нурданул дуцIиннав, рухI алжаннул ххари даннав.
ЦIуликъяннал ва Кьубиял
жямат, гьалмахтал, дустал
ХIажимусил душ Будайчиева Багъдада
Октябрьданул байбихьулий аьпалувух бивхьунни бакI-чурххалгу бювхъусса, аькьлу-кIулшиврулгу итххявхсса, щалва тухумрангу бусравсса, ШавкIратусса Будайчиева Багъдада ХIажимусил душ.
Багъдада зий буссия чIярусса шиннардий МахIачкъалалив хъунмасса ттучандалул директорну, дуллуссия, ванил захIматран лавайсса кьимат бишлай, тамансса бахшишру ва хIурматрал лишаннугу. Буссия хъинну коллектив лагма лаган бан кIулсса, ка-кумаг аьркиннал дакIния щин хIачIайсса, зунттал кьануннай зий-заназисса хъамитайпа. Дахчунни Багъдадахун кIул дакъа азар, лавгунни, жугу банд лаган бувну, хIайп тIутIи бувну.
Багъдадал бивкIулул къумашиву кIидачIлай, жижара буллай буру арснахь Исмяиллухь, душварахь Заирахь, Ларианахь, ссурваврахь Зинахь, СултIанатлухь, щалвагу агьлу-авладрахь.
Багъдада алжаннул ххари баннав, барачат махъ ливчIун лякъиннав, ванин ххираминнал оьрму лахъи баннав.
ШавкIуллал жямат
Бургъил нур хIайран шайсса
Пар-партIи мусил симан
ХIайп дакъаяв, я Аллагь,
ЛухIи гьаттавух дишин.
Щяв къадагьай бирлиянт
Щяллил дюркьун ларгунни,
Гъав лавгунни, левщунни
Гъаннал дакIурдил чирахъ.
Зал вищал архIал хьуннав,
Пирдавс алжан булуннав,
ХIурулъэнт лагма лавгун,
Гьав нурданул дуцIиннав.
Сурая Какваева
МахIаммалул арс КьурбанмахIаммадов Амир-хIажи
Вай гьантрай, къашавайгу ивкIун, лавгунни дунияллия захIматрал ветеран, 1-мур ЦIувкIратусса, Каспийскалив яхъанай ивкIсса МахIаммалул арс КьурбанмахIаммадов Амир-хIажи. Увссар ва 1-мур ЦIувкIуллая арх дакъасса Ххяллуаьл тIисса мащилий.
Оьрмулул 14 шинаву ва буттал гьан увну ур Ккурттайннал шяравун къалайчинал касму лахьхьин, касмугу лархьхьуну, тиккува зий ивкIун ур, кулпатрал маэшат гьаз буван нитти-буттан кумагран хIарачат буллай.
ЦIувкIратусса Кабиратгу щарну бувцуну, кулпатращал кIира шинайсса Къазахсттаннайн лавгун, зий ивкIун ур Шевченко шагьрулий. Тиха учIайхту, Каспийскалий мина дирхьуну, «Дагдизель» заводрай зун ивкIун ур. МукьцIалла шинал лажиндарай заводрай зий бувсса захIматрахлу лайкь хьуну ур заводрал ва шагьрулул хъуниминнал чулухасса ХIурматрал лишаннан ва Барчаллагьрал чагъардан. Пенсиялийн уккайхту, диндалухун агьну, Каспийскаливсса агьалинал бивкIу-буккулул диндалул аьдатру дуллай, кьулгьу-кьуран буккин занай уссия. Ва ххуйну дакIний ссар Каспийскаливсса лакран, мудангу бивкIу-буккулучIа ацIайсса уздансса адамина хIисаврайгу, жагьилминнан дин дан, чак буван лахьхьин буллай ивкIсса хъуначу хIисаврайгу. Лавгссия Макка-Мадиналив хIажливгу.
Амир-хIажи ия агьалинащал хIал бакьусса, ихтилат тIааьнсса, иминсса адамина. Ванал хIурмат халкьунначIа лахъсса бия, бушиву исват хъанай бия чIявусса инсантал сукIурайн батIаврийнугу.
Амир-хIажи дунияллия лагаврил кьурчIишиву кIидачIлай, жижара буллай буру кулпатрахь Кабиратлухь, арсурваврахь ХIажиаьлихь, Шяпинахь, Эмраннухь ва Мурадлухь, душнихь Земфирахь, уссихь Сулайманнухь, наслулухь, щалвагу агьулданухь. Амир алжаннул ххари уваннав, ванал барачат махъначIа ливчIун лякъиннав!
1-мур ЦIувкIуллал жямат,
Каспийскаливсса лак
МахIаммадвалил арс Сунгъуров ЖахIпар-Рамазан
Ноябрь зурул 14-нний оьрмулул 72 шинаву ахиратрал хьунни ххаллилсса хьуричу, жяматраву хIурмат лавайсса, кьянкьа-кьурчIисса хасиятрал заллу, МахIаммадвалил арс Сунгъуров ЖахIпар-Рамазан.
Увссар ЖахIпар-Рамазан 1947-ку шинал Хьурттал шяраву, Хъун дяъвилия зана хьусса МахIаммадвалил ва ПатIиматлул кулпатраву. Арулва класс къуртал бувну, даврилгу, багьу-бизулулгу дузал хьуну, къатта-къушгу бувну, шяравуминнангу, дустурангу бусраврай оьрму бувтссар ванал. Ванал хъунмур оьрму щупирну зий лавгссар.
Чув зий ухьурчагу, лажин кIялану, архIал зузиминнал дянивгу кьадру-кьиматрай уссия.
ЖахIпар-Рамазан аьпалухьхьун лагаврил кьурчIишиву кIидачIлай буру ванал кулпатрахь, арсурваврахь, душнихь ва махъсса цинявппагу гъан-маччанахь. Алжаннул ххари аннав, гьав нурданул дуцIиннав!
Хьурттал, ХьурукIуннал,
Карашрал жямат
