Августрал 26-нний МахIачкъалалив шадлугърал тагьарданий тIиртIунни «Бурчул ттуп-2019» тIисса шагьрурдал хIаятирттал ва махIлардал командарттал дянивсса футболданул 22-мур турнир.
Турнир тIитIаврий гьуртту хьунни Дагъусттаннал парламентрал спикер Хизри Шихсаэдов, ПаччахIлугърал Думалул депутат ХIажимет Сапараьлиев, МахIачкъалаллал спорткомитетрал председатель Марат Ибрагьимов, РДЮСШ-лул директор Александр Маркаров, Ухссавнил Ккавкказнаву цалчинма олимпий чемпион Загъалав Аьбдулбеков ва цаймигу.
Хизри Шихсаэдовлул, бавтIминнал хьхьичI махъ лахълай, увкунни: «Аьзизсса оьрчIрув, хIурмат бусса нитти-буттахъул! ХIакьину Дагъусттаннай тIитIлай буру хъуннасса футболданул байран. Ва турнир тамансса шиннардил хьхьичI сакин дурну диркIссар цIа дурксса футболчи Лев Яшиннул, Дагъусттаннай тIурча ванил сиптачи хьуссар Александр Маркаров, жу мунайн барчаллагьрайгу буссару».
Яла бавтIминнан концерт ккаккан дунни «МахIачкъала» ва «Салам» тIисса къавтIаврил ансамбллал.
«Бурчул ттуп» тIисса республикалул футболданул турнир хъанахъиссар Ухссавнил Ккавкказуллал федерал округрай яла хъунмурну. Муний гьуртту шаврил хIакъиравусса заявкарду дуллуссар, МахIачкъалаллал бакъасса, цаймигу шагьрурдал ва районнал.
Гьашину муний гьуртту хьунтIиссар 700-нния ливчусса чIава футболчитал.
ХIадур бувссар
ХI. Аьдиловлул
