«Гьунардал дуниял» – Лаващавгу

Жу уттинингу чивчуссия цайнува цивппа хьусса художниктурал дирхьусса суратирттая дурсса, «Мир талантов» цIанилусса, ца кIаная цамур кIанайн ласайсса выставкалия. Му уттинингу дирссар республикалул районнайн ва шагьрурдайн. Ва ххуллух тIурча, му выставка хьунни Лаващиял райондалий.

Выставкалул сакиншинначину бур коммерческий дакъасса «Культуралул ирс» тIисса фонд, АьФ-лул ва ДР-лул Культуралул министерстварттал чIарав бацIаврийну. Выставка дуллалиссар «Культура» цIанилусса нацпроектрал лагрулий.
Ца кIаная цамур кIанайн ласласисса выставкартту хъанахъиссар ДР-лул Культуралул министерствалучIасса Республикалул Халкьуннал творчествалул къатлул дуллалисса даврил ца агьамсса бутIану.
Ва экспозициялий дур цайнува цува хьусса 20 художникнал дирхьусса 40 сурат. Сугъури Увайсовлун, ХIажи Сунгъуровлун, Светлана Аьлибекован, Рашид Садулаевлун, Басир Мирзоевлун, Камалуттин Хайбуллаевлун ва выставка хъанахъиссар цалла дирхьусса суратру чIявусса инсантурал хьхьичIун дуккан дуллалисса цалчинсса давуну.
Выставка, чув дулларчагу, тIитIайссар шадлугърал тагьарданий. Мукунна ва ххуллух Лаващавгу. Выставка тIитIлатIисса ихтилат бунни райондалул культуралул отделданул начальник Халид Муталимовлул, Лаващиял райондалул депутатътурал мажлисрал председатель Юсуп Аьлибековлул.

Камилла АьбдурахIманова,
ДГУ-лул филологиялул факультетрал ОЖ-лул 2-мур курсирал студентка