Республикалул Халкьуннал творчествалул къатлул сакин бувну, уттигъанну МахIачкъалалив «Журавлик» тIисса цIанилусса оьрчIал санаторийлий хьунни синааьрщарая ссихьри дуллалисса мастер-класс.

Санаторийлийсса оьрмулул 6 шинава 10 шинавун бияннинсса 20-нния ливчусса оьрчIру гьуртту хьунни ва давривух. Республикалул Халкьуннал творчествалул къатлул пишакар Зугьра Гьаруновал бувсунни оьрчIахь ва сянатрая, бувсунни цилла 5-нния лирчусса шинну хъанай душиву Дагъусттаннал инсантуран хасъсса симаннащалсса ссихьри дуллай, гьарца ссихьул цилла-цилла янна душиву ва ми яннагу цилла дуруххайшиву.

ОьрчIру цивппагу хъунмасса гъирарай дуллай бия цала ниттихъал, амухъал, ттаттахъал симаннащалсса ссихьри, мукунна цанна ххирасса мультфильмрдавасса персонажирттал лажинтру дуссагу.

Мастер-классрал сакиншинначитал ва мунивух гьуртту хьусса оьрчIру хъинну рязийну ливчIунни ва даврия.

Уку-укунсса давуртту чара бакъа аьркинссар махъа нанисса никирттайн жула буттал буттахъал аьдатру дияншиврул.

Камилла АьбдурахIманова, ДГУ-лул филологиялул факультетрал ОЖ-лул 2-мур курсрал студентка