[dropcap]С[/dropcap]ентябрьданул 24-нний МахIачкъалалив «Аьрасат – ттул тарих» тIисса музейраву байбивхьунни Жагьилсса ватанлувтурал форум. Ва тIитIлатIисса шадлугърай гьуртту хьунни ДР-лул БакIчи Владимир Васильевгу.
З. АьбдурахIманова
Билаятрал личIи-личIисса регионнай ва чил хIукуматирттай ччянива миналул хьусса жула хъунмур никирал ватанлувтурал арс-душваврахь баврув учин мукунма шиккун бувкIун бия ДР-лул Халкьуннал Мажлисрал председатель Хизри Шихсаэдов, ДР-лул БакIчинал ва ХIукуматрал Администрациялул каялувчи Владимир Иванов, Аьрасатнал МИД-рал пишакартал ва жяматийсса ишккаккулт. Музейрал личIи-личIисса майданнай хъамаллуран тамашалун щуруй дия жула Бархъаллал, Оьргърал, ГьуцIалтIиял усттартурал ва заргалтурал дурсса тIахIунттал, арцу-мусил затирттал, янна-ярагъуннил выставкартту ва ишттахI бунал ххал дансса жула миллатирттал дукрардал ссупрардугу.
Форум сававну Ватандалийн бувкIун бия 300-ннийн бивсса жагьилсса оьрчIру ва душру. Чансса бакъая гьуртту хьун гъира багьсса оьрмулул бугьарамигу. Ванил хъунмур мурадгу щалла дунияллийх ппив хьусса дагъусттанлувтурал пикри-зикрирду цачIун бансса, Ватандалухмур ччаву гуж дансса ва буттал буттахъал аьдат-эбадатру дакIнийн рутансса ва цIулаган дансса бия.
Форум батIаврил хъунмур хъар цайнна ларсъсса ДР-лул миллатирттал политикалул ва диндалул иширттал министр Энрик Муслимовлул шадлугъ тIитIлатIисса мукъуву кIицI лавгуна жучIанма ва давривух гьуртту хьун 20 билаятраясса халкь бучIан рязи хьушиврул чIалачIи буллалишиву шиная шинайн Дагъусттан культуралул ва ишбажаранчишиврул арарду цIакь хъанахъисса кIану хъанай бушиву.
Хъирив хъамаллурахь баврув тIисса мукъуву ДР-лул БакIчи Владимир Васильевлул кIицI бувна, дагъусттанлувтал чув ялапар хъанай бунугу, цими шинал хьхьичI Ватандалия бивзун гьарчагу, цала ппухълуннал аьрщи ххирасса, цала тарих кIулсса, аьдатру ва культура дурурччусса, миннул кьадру-кьимат кIулсса халкь бушиву.
— Уттигъанну республикалий хъинну лахъа-хъунну кIицI лагарду Дагъусттаннайн къачагътурал кьюкьри ххярххун, ми ппив дурну 20 шин хъанахъисса иш. Га чIумалгу зу чIалачIи бувссар зула ужагъ, жямат, Ватан ххирасса, миннух жанну дулун хIадурсса халкь бушиву. Щала билаятрайх ппив шавай диркIсса террорданул азаргу шиккур духлаган дурсса. Ва ишираву хъунмур хъар укунмасса, ярагъвагу канихь къабивкIсса, агьалинал цайннар ларсун диркIсса, — увкунни Васильевлул.
Дусшиврийсса арарду цIакьну душиврухлу барчаллагь увкуна ванал жулла шаннагу диндалул вакилтурахьгу ва кIицI бувна агьалинал дянивусса аслахIшивруцIун кабакьу буллалишиву спортралгу. БакIчинал гихунмайсса ихтилатравугу гьаз бувна ватанлувтурал ва Дагъусттаннал дянивусса арарду ва дусшиврул ламурду цIакь бавриву ишла буллантIисса цайми масъаларттугу.
Махъру мукунма лавхъуна Аьрасатнал МИД-рал вакилтурал ва жяматийсса ишккаккултралгу.
Хъирив форумрал даву щурущи дуруна личIи-личIисса майданнайсса мастер-классирттайх, ккуркки столлайх ва семинар-батIавурттайх.
Хъиривмур кьини хъамаллуран хIадур дурну дия Манасрая арх бакъасса «Каспий» санаториялий хьунтIисса «Каспий-2019» форумрай гьуртту хьунсса программагу. Мува кьини хъамал бувцуна аьвзалзаманнул Дарбант ккаккан ва мунил тарихращал кIул бан.
