[dropcap]С[/dropcap]ентябрь зурул 25-нний МахIач­къалалив Ума Муртазааьлиевнал цIанийсса захIматрал ва социал вардиширттал центрданий байбивхьунни цIуллу-сагъшиврул мушакъатшиву

ду­сса оьрчIал дянивсса бюхъурдал даража ккаккан буллалисса «Абилимпикс» региондалул III-мур чемпионатрал бяст-ччаллу.

---

Имара Саидова
Гьашинусса чемпионатрал давривух гьуртту хьунни ДР-лул БакIчи Владимир Васильев, ДР-лул захIматрал ва социал хьхьичIунмайшиврул министр Изумруд МухIуттинова, ДР-лул информатизациялул, связьрал ва массовый коммуникациярттал министр Сергей Снегирев, ДР-лул жагьилтурал политикалул министрнал хъиривчу ПатIимат Оьмарова, ДР-лул жагьилтал давурттал дузал бувайсса «Успех» центрданул директор Шамил МахIаммадов, республикалул кIулшивуртту дулаврил идарарттал каялувчитал ва цаймигу.

Шиккува кIицI лаган, Аьрасатнал регионнава Дагъусттаннай цалчин байбивхьуссар цIуллу-сагъшиврул муша­къатшиву дусса оьрчIал дянивсса пишардал бюхъурду ккаккан буллалисса чемпионатру дуллай. Бяст-ччаллу бу­ссар 16 журалул.

Гьашинусса чемпионатрал даврин лавайсса кьимат бивщунни ДР-лул Президент Владимир Васильевлул. Президентнал, гьарца оьрчIащал аслу-суалгу бувну, ялтту увккун, ххал бивгьунни пишардал бюхъурду.

— Укунсса оьрчIал даврихсса гъира-шавкь ххал хьувкун, вайннащал зузи­сса педагогтурал захIмат хIисав хьувкун, мукIру хъанай буру, ччан бикIарчан, дан къабюхъайсса даву дакъашиврий. Укун­сса сиптачитурал захIмат ласун аьркин­ссар хIукуматрал аякьалийн, — увкунни Васильевлул.
Чемпионатрал даврин лавайсса кьиматру бишлашисса ихтилатру бунни мероприятиялий гьуртту хьусса идарарттал каялувчитуралгу.
Сергей Снегиревлул цала ихтилатраву кIицI лавгунни информациялул технологиярттай зунсса жагьилтал кьамул бан мудангу хIадурну бушиву.