Сентябрьданул 20-нний «Дагестан» РИА-лий хьунни «Каспий Плаза» ООО-лул директор Заира Ширинбековал ва мунищал
бувкIсса «Авилон» тIисса проектру дайсса компаниялул вакил МахIаммад Расуловлул пресс-конференция.
ХI. Аьдилов
Заира Ширинбековал тIимунийну, Каспийскаллал жяматращалсса къалмакъал хIасул хьуну дур «Каспийск» тIисса социал-экономикалул лябуккулул аьрщарай (территория опережающего социально-экономического развития) ттизаманнул гостиницалул комплекс ва апарт-отель «Каспиан Плаза» аквапаркращал баврил хIакъираву.
Жяматращалсса ччалаччаву (противостояние) дайдирхьуну дур кIа комплекс буллалисса кIанай чапар дурния махъ.
Иширал хIакъираву Заира Ширинбековал укун бувсунни: «Жу, рязи бакъасса жяматращал цаппаралийла хьунабавкьуну, бусарду жулла проектраяту. ЦIу бутIуй шагьрулул инсантал рязину бия жу дан нанимуний бан най буну тIий аквапаркгу, дельфинарийгу, аттракционнугу. Утти инсантал, рязи бакъа, къарши буклай бур, жун бувчIлай бакъар мунил савав», — кунни мунил.
Ширинбековал тIимунийну, хIакьинусса кьини ихтияр ларсун дур 1,8 гектарданий апарт-отель буван. Щалва комплекс бантIий бур 9,5 гектарданий. Каспийскаллал администрация ва жямат цалийн бучIан най бакъар, мунияту аьрщи ишла даврил кьяйдарду ва генплан уттигу цIакь дурну дакъар, проектгу щаллуну чулийн дуккан дан бюхълай бакъар.
МахIаммад Расуловлул тIимунийну, 4,5 гектарданий инвесторнан ччай бур буван бялахъаврил парк. Му бикIантIий бур аттракционнащалсса хъунмасса парк, микку бантIий бур коммерциялул объектругу. Проектрах харж дувантIий дур 3,2 млрд къурушрал, дузал бантIий бур 147 инсаннансса зузи кIану.
Яла журналистътурал буллай бия суаллу, амма жавабру дулунми бакъая: къабувкIун бия шагьрулул администрациялул ва рязи бакъаминнал чулухасса вакилтал. Мунияту икьрал хьунни мигу гьурттуну цал ялагу пресс-конференция дуван.
