Августрал 29-нний Дагъусттаннал вице-премьер Владимир Лемешкол региондалул министерстварттал ва цаймигу идарарттал вакилтуращал цачIу ххал бивгьунни «Информациярттал инфраструктура» тIисса федерал проектрал ца бутIану хъанахъисса, социал мяъна дусса объектру «Интернет» сетрацIун базаврил масъала.
ЦIанасса ппурттуву Аьрасатнал федерациялул Цифрардал лябуккулул, связрал ва агьалинансса коммуникациярттал министерствалул ва «Квант-Телеком» АО-лул дянив чирчуну дур ПаччахIлугърал кьутIи. Мунийн бувну, республикалий пландалийн лавсун бур ИнтернетрацIун базин 2542 объект, миннувух бур школартту, ФАП-ру, администрацияртту, бувчIавурттал комиссияртту, пожардал частру. Гьашину базинтIий бур 1134 социал объект.
ДР-лул ХIукуматрал зампреднал тIимунийну, проект дузрайн дуккан даврийну республикалул агьалинал оьрмулуву тамансса къулайшивуртту хьун тIий дур: «Жува цифралул экономикалия, аякьалийсса хIукуматрая, конкуренция духIаврия гъалгъа тIий бухьувкун, интернет диян аьркинссар властьрал циняв даражардайн. ИнтернетрацIун циксса чIявусса идарартту, объектру бавзуну бурив, муксса лябукку хьунтIиссар республикалун.
Интернет школарттайн, азарханардайн, ФАП-ирттайн, администрациярттайн диян дуллай, жува чIявусса ишру анавар буккан буллантIиссару. Агьалинан кIулну бикIан аьркинссар республикалий хъанахъисса иширттая ва тIайланнасса дахIаву дикIан аьркинссар хIукуматращал. Оьрму ххуй-хъин шаврицIун, къулайшивурттугу дикIан аьркинссар», — увкунни В. Лемешкол.
БатIаврил лагрулий дунни цаппара тапшурлугъругу.
