Сентябрьданул 3-нний ДР-лул БакIчи Владимир Васильев лаивзунни республикалул ялапарчитурайн Терроризмалущалсса талатавриву цашиврул кьинилун (День солидарности) хасну.
«ХIакьину Аьрасатнаву кIицI лаглай бур дакIния къабуккайсса тарих – Терроризмалущалсса талатавриву цашиврул кьини. Ванияр 15 шинал хьхьичI Бесланнай хьусса апатIсса иширттал гьалак дуккан дуруна щалла дуниял, гьарца аьрасатлувнал дакIниву лирчIуна хъин къашай щаву. Му кьини жува ляличIисса хажалатращал дакIнийн бичарду Къизлардай, Буйнакскалий, Каспийскалий ва цаймигу шагьрурдай хьусса терактирдай ливтIуми, хIурматрай дакIнийн бичару терроризмалущалсса талатавриву жанну дуллусса аьралитал ва ихтиярду дуруччай органнал зузалт, диндалул, жяматийсса ва паччахIлугърал ишккаккулт.
Цашиврул кьини хъанахъиссар терроризмалийн къарши буккавриву паччахIлугъ ва жямат цачIун шаврил лишанну.
1999 шинал республикалийн чапхунчитурал кьюкьри ххярхсса чIумал, дагъусттанлувтал бувхссар ополчентурал кьюкьравун ва федерал аьралитуращал ва ихтиярду дуруччай органнащал архIал дурурччуссар Ватан.
АьФ-лул Президент В.В. Путиннул каялувшиврий гужирдал идарарттал, властрал органнал ва жяматрал хIарачатрайну сакин дурссар терроризмалийн къарши дуккаврил мюнпатсса система.
Жува хъамакъабитанну цалва оьрмурду инсантурал мюхчаншиврухлу харж бувми, миннал гьунардайну цIусса никру тарбия дуллай, цIакь дулланну дакьаву ва аслахIшиву, жущава бювхъусса хIарачат буванну Дагъусттан жула Ватандалул ца яла мюхчанмур ва тIутIайх бичлачимур регион баву мурадрай», — тIий бур лабизаврий.
