Уттигъанну ссурахъилгу, ттулгу дянив ихтилат багьуна ЦIуйшатусса Мусал ва РайхIанатлул кулпатрая, ми цал­ва душвара­щал ГьунчIукьатIрал шяравун бивзун яхъанай бикIаврия.
ХьхьичIва даву дусса колхозирттавун тIайла буккайвахха дур­ккуну къуртал хьуми. Мукун МахIаммадов Мусагу ятти-гъаттарал духтурну тIайла увккун ивкIун ур ГьунчIукьатIув. Цува унийн РайхIанат ва шанмагу душгу бувцуну бур цащалва.

Ва макьала чичин савав хьусса МахIаммадова (ласнал фамилиялий Аьбдуллаева) Залинагу дуклай бивкIун бур ГьунчIукьатIрал школалий. Навагу къуртал бувсса школа бухьувкун, ттунгу ччан бивкIуна «Илчилул» буккултрахьгу бусан Санкт-Петербург шагьрулий университетрал доцентну зузисса цIуйшири душ Залиная.
Махъ ппурттуву жула республикалул каялувшиндарал таман­сса дагъусттанлувтал кIункIу бувунни жучIава зун, лявхъу кIанттун хIалуну, мюнпатну лякъин.

---

— Залинай, буси виятува, вила къатта-къушлия?
— На бувссара 1983 шинал МахIачкъалалив. Школданийн занан бивкIсса чIумал, ттун ба­ххана буван багьуна шанма школа – ЦIуйшиял, ГьунчIукьатIрал, Вихьуллал. Мунил сававгу дия жул ппу, МахIаммадов Муса, давурттай зун личIи-личIисса шяраваллавун тIайла уклай икIаву. Ппу ия гъаттарал хIакин. Кулпатгу бизайссияв мунал хъирив.

— Цукунсса асарду ливчIри дакIний, Гьун­чIукьатIрал школа­луцIун бавхIуну?
— На ГьунчIукьатIрал школданийн 3-мур классравун лавг­ссара, дуклайгу бивкIссара 6 класс къуртал баннин. Ца душ ва шама оьрчI бикIайссияв класс­равугу. Жул классрал каялувчи бия Асият Каримовна. Му бия оьрчIру ххирасса ва хъинну кIулшиврул ялув бавцIусса учительница. Яла лавайми кла­ссирттаву математикалул, физикалул дарсру дишайва Насият МахIаммадовнал, хъинну дюхханну дарсгу дурчIин дайва мунил.

— Ци савав хьуна ина хасну информатикалул ва управлениялул факультет язи бугьан, захIматну бакъаяв кулпатрал хьуну махъ ласналссагу, оьрчIалссагу, дуккаврилссагу буван? Зунттал аранталния бикIай хъаннин дуккаву ссан аьркинссар, шаппа оьрчIалсса бувача тIий.
— Нава информатикалул ва управлениялул факультет язи бугьаврин савав хьусса ххай бура ттула ниттирссил, Аьлиева Нажаватлул ттунна, цалчинмур классраву дуклакисса ссил душнин, цилла дипломрал даву чирчусса ручка пишкаш дуваву. Мунилгу марцIсса ххювардай къуртал бувссия вава факультет. Ласналгу ттун хъунма­сса кумаг бувссар, кабавкьу­ссар, ччарчан мукъуйну, ччарчан даврийну, на дуккаву къакьаританшиврул.

Ттувусса гъира чIалай бикIайва мунангу, шаппасса нитти-буттан ва ссурваврангу. Хъунмасса барчаллагь ттула буттан, Мусан, ттун захIмат хъанахъишиву чIалай, оьрчIах ургаву цайнна ларсуна на дуклакиссаксса хIаллай. Ни­ттил, ссурваврал аьркинлугърал чулуха оьккину къабитайвав. Псков шагьрулий, дугу- дурккуну, лас зий ия контрактрай ВВС-раву. Утти жун квартира буллуну Санкт-Петербурглив, шиккун бивзун буру.
Шиккува кIицI бан, хъунма­сса барчаллагьрай бикIара ттухьра дарсру дирхьусса учительтурайн: МахIаммадова Мариян Аьлиевнайн, ХIасанов ТIагьир Аьлиевичлуйн, Щайхов Щайх Оьмаровичлуйн, Аьшаев Салим Нуруллагьовичлуйн. Хъамакъабитанссар 10-мур класс­раву физикалул олимпиадалийн хIадур хъанахъисса ттухьва чун дуклан буххансса пикри бур кусса ТIагьир Аьлиевичлул суал. КъакIулли, ттигу цалий къабавцIура кувкун: «Циван бура пикрирду буллай, бу­хху физматравун, яла «кандидатскийгу» дурурччуну, оьрмулухун хъамитайпалун яла аьркинсса пиша бикIанссар вил», — увку­сса махъру ттул бакIрава къабуккайва. Физматравун на къабувхра, амма кандидатский дуруччав, мунал кIулли кIунттихьхьун дуллусса кунна.

— Ина шяраваллил школарттайгу, шагьрулул школалийгу дуклай бивкIун бура, ци дахханашиву щуркIал шайва, чув дуллумур кIулшиврул цинцилу кIу шайва?
— Нава нигьабуслай би­кIайссияв, ттунна кIулшиву чанну дикIанссар, оьрус мазрал итххявхсса бакъахьун­ссара тIий, хьхьичIппурттуву. Амма марцIсса ххюварду ласай­ссия, шагьрулий дуклакийнигу. ЦичIав тапаватшиву щуркIал къархьунни. Дуккаврих гъира бухьурчан, личIишиву дакъа­ссар. Ттувун дуккаврихсса гъира бутавриву къачIивисса кIану бувгьуссар ГьунчIукьатIрал школданул учительтуралгу.

— Аьрасатнал халкь, вищалва зузими цукун буруглан бикIай вих, ккав­кказ душних, бусурман душних?
— Гъанну кIул хьуннин чансса мугъаят хъанан бикIай, яла, цукунсса буссарив бувчIукун, гьакссагу хIурматрай бикIай.

— Буси вила кулпатрая, оьрчIая. Цукунсса дур Ла­ккуяллицIунсса дахIа­ву?
— Жул бур ца оьрчI ва ца душ. ОьрчI 2-мур классраву дук­лай ур, душнин 6 шин дур, садикрайн занай бур. Лаккуйнгу бучIару – ЦIуйшав. Щуну-Зунттуйн лахъан ччай буру, Аллагьнал кабавкьуну, оьрчIащал. Лакрал аьдатирттаву ттун ххуй дизай, цайминначIа муксса гурну къахьунадакьайсса, Хъурдаккаврил байран. Хаснура ГьунчIукьатIрал дувайсса куц. Хъузалал ккунукрал ххункIру, дукьрахIан, жура-журасса дук­рарду, хъуними, мюрщими личIи бакъа, хъув бувккун, дялахърурду дуллалаву. Жугу оьрчI заманнай му байрандалия хIаз ласайссия.

— Залинай, тIайлабацIу баннав вил цинявппагу иширттаву. Ябаннав зул кулпат Заннал!

Ихтилат бувссар
Загьрани Аьбдуллаевал