Шушими
[dropcap]Ш[/dropcap]ушиннал шяраваллил тарихийсса мина диркIссар Гъумучату ухссавнил чулийннай 22 км. манзилданий. Мунил чIаххуврайсса шяраваллуну хъанахъиссар: КIундими, ЧIари, ЧIаящи, Гьуйми, Муккур.
1886-кусса шиналсса переписьрайн бувну, Шушиннал шяраву диркIун дур 43 хозяйство. Шяравалу сакин хьунугу диркIун дур, лагмара диялсса дуниялгу чIалачIисса лахъшиврий, ца ххялларисса цуппалусса бакIуцIух. КIа бакIул ухнилухсса ххяллал чIаврдай хIакьинусса кьинигу ххал хьун бюхъайссар хьхьичIазаманнул суратру. («наскальные рисунки»).
Революциялул чIумалсса иширттал ца яла яргсса ва цIанихсса гьурттучину ивкIсса Адам Жалиевлул цIа къабавсса чансса бакъа бакъахьунссар. Му ивкIссар Шушиннал шяраватусса. Му зий ивкIссар Лакрал райондалул милицанал начальникнугу, У. Буйнакскийл цIанийсса цалла колхозрал председательнугу. Зунттава арандалийн бизан бувну махъгу Шушиннал колхозрал председательну ивкIссар мува Адам. Бизан бувну ца шинавату аьпалухьхьунгу лавгссар.
Лаккуя бизан байсса шинал Шушиннал шяраву диркIун дур мира 43 хозяйство, яхъанайгу ивкIун ур 201 инсан. Бивзун мукьах ЦIуссалаккуй колхоз диркIун дур Аьхъардащал цачIусса, «Дружба» тIисса.
Хъунмасса Буттал кIанттул цIанийсса дяъви байбивхьусса шинал Шушиннал шяравату аьрайн лавгун бур ярагъ кIунттил бугьан шайсса сайки циняв арамтал.
Лаккуйсса чIумал 30-ку шиннардий шяраву бивкIун бур байбихьулул школа. ЦIуссалаккуй 1985-ку шинал Шушияв тIивтIуну бивкIссар дянивмур даражалул школа.
ХIакьинусса кьини Шушиннал щар щаллуну дирзун дуссар ЦIуминалийн – Новостройрайн. Зий буссар администрация, буссар дянивмур даражалул школа.
Махъсса шиннардий ЦIуссалакрал райондалул администрациялул бакIчину зузисса МахIаммад-ХIажи Айдиев Шушиннал шяраватуссар.
ХIакьину ДР-лул экономикалул министрнал къуллугъ биттур буллалисса ХIажи Султановгу Шушиннал жяматрал вакилли.
