[dropcap]В[/dropcap]а зурул 11-19-нний Грознай шагьрулий хьунни цалчинсса Щалагу Аьрасатнал миллатирттал театрдал фестиваль – «Федерация».

Зулайхат Тахакьаева
Фестивальданул мурадну бур Аьрасатнал миллатирттал дянивсса рувхIанийшиврул ва магьирлугърал арарду цIакь даву, миллатирттал мазру ва мазурдийсса магьирлугъ дуруччин­сса.
Фестивальданул сакиншинначитурал агьамсса къулагъас дуллай бур билаятрал хьхьичIунсса театрал гужру миллатирттал театрдайн лажинну кIура баен бан, миллатирттал театрдал даву федерал даражалий машгьур дан, аьрасатнал магьирлугърал аслийшиву ядан, миллатирттал театрдал сий гьаз дан.

Аьрасатнаву бусса бур 200 миллатрал театр, ниттил мазурдий зузисса. Аьрасатнал Теат­рал ишккаккултрал союзрал Эксперт советрал фестивальданий ккаккан бан язи бувгьуну бия билаятрал 13 региондалиясса 14 спектакль, хьхьичIра ххал дурсса видеоматериаллал хIасиллайн бувну.

[pullquote]Лакрал театрданун буллунни фестивальданул диплом, лишан ва хъамакъаритансса бахшиш.[/pullquote]
Му тIайлабацIу хьунни А. Къапиевлул цIанийсса Лакрал паччахIлугърал музыкалул ва драмалул театрданунгу. Фестивальданий гьуртту хьусса яла хъунмур ва яргмур труппалунгу жуласса ккалли буллай бия критиктал ва тамашачитал.
АцIансса кIану бакъа був­цIуну бия М. Ю. Лермонтов­лул цIанийсса Оьруснал паччахI­лугърал театрданул азараксса инсан лагайсса зал «Камаллул Башир» ккаккан бувкIсса тамашачитурал. Цукссагу хIаллай ливчIуна ми кьакъабагьавай хъат­ру ришлай.
Спектакльдания махъ фестивальданул художествалул совет­рал батIаврий «Камаллул Башир» спектакльданун лавай­сса кьимат бивщунни билаятрал хьхьичIунсса театрал критиктурал. Миннал чIурчIав дурунни чIивисса миллатрал театр, ссу­ссукьусса каширдах къабурувгун, хIакьинусса чIумущал шаттирду лавсун най бушиврий.
Художествалул советрал хъунама, Аьрасатнал халкьуннал артист Борис Морозовлул цIардай кIицI лавгунни музыка (композитор – Аьрасатнал халкьуннал артист Ширвани Чаллаев), режиссернал даву (Аслан МахIаммадов, Муса Оздоев), сценография (Ибрагьимхалил Супиянов), костюмру (Фатима ХIажибекова), балай учаврил, къавтIавурттал ва актертурал тIуркIулул усттаршиву.
— Спектакль ххал бан хьхьичI дуккав лакрал миллатращал ва театрданущал кIул хьунсса чичрурду. Цалчинма-цалчинсса асар – 195 азара инсан усса миллат. Спектакль ххал бувну махъ тIурча, на хIайран хьуну ливчIунна, – увкунни театрал критик Глеб Ситковскийл.
— Хъинну бунияласса, аькьил­сса, инсан чантI учин уллали­сса спектакль бур, — увкунни ГИТИС-рал педагог Екатерина Морозовал.
Ххаллилсса спектакльданухлу Лакрал театрданул каялувчитурахь, режиссертурахь, актертурахь барчаллагь увкунни Аьрасатнал Театрал иш­ккаккултрал союзрал секретарь Дмитрий Родионовлул, РСФСР-данул халкьуннал артист Рифкат Исрапиловлул.
Яла-яла хIайран хьумур бия Аьрасатнал Театрал режиссертурал гильдиялул жаваблувсса секретарь Марина Корчак. 2011 шинал Владикавказ шагьрулий дунияллул халкьуннал дянив­сса миллатирттал фестивальданий ккаккан бувсса «Бернарда Альбал къатта» спектакльданиясса ванил асарду хIакьинусса кьинигу хьхьара хьуну бакъая (ДакIнийн бутанну тикку спектакль ххув хьуссия ххюва номинациялува шамунниву.
— Аслан МахIаммадов на ккалли ара Ухссавнил Ккав­кказнал яла хьхьичIунсса режиссертуравасса цаннан, Да­гъусттаннай тIурча – цалчинсса даражалул режиссернан, актер хIисаврайгу, на ва ишара цалчинминнавух. «Камаллул Башир» спектакльданиягу ттуву лирчIунни так хIайраншиву, — увкунни ванил.
Фестивальданул лагрулий хьунни Ухссавнил Ккавкказнал театрал форум – «Российский театр -ХХI век. Новый взгляд» тIисса.
Сакин бувну бия актершиврул, режиссершиврул магьиршиву, сахIналул маз усттар бан­сса мастер-классругу.