Дагъусттаннал паччахIлугърал филармониялул залдануву августрал 30-нний хьунни, лакрал миллатран бакъассагу, да­гъусттаннал халкьуннан ххира

хьусса Шагьалай МахIаммадовал ва Нурианна Къаллаевал балайрдал концерт. Лакку балайрду ххираминнал щапI куну буцIин бувну бия хьхьирил зуманивсса филармониялул зал.

---

Имара Саидова
Концертрайн бувкIминнавух, лак бакъассагу, тамансса бия цайми миллатирттал инсанталгу.
«Шагьалай, лахьхьин ба ттунгу балай учин», — тIий, хъярч буллай уссиявча, вин тIабиаьтрал балайлул гьунар буллуну ба­къарча, паракьатну икIу кунни», — тIий, буслай ур концерт­райн увкIсса, оьрму спортран хас бувсса, цIанагу шагьрулул администрациялучIасса спорт­рал комитетраву зузисса, 82 шинавусса яручу ОьмарасхIаб Оьмаров.

Мяйжаннугу, ванал тIимур хIакьсса бур. ТIабиаьтрал буллусса гьунардануцIун Шагьалай ва Нурианна бур ххишала бакъа итххявхсса, цала даву ларайну кIулсса пишакарталгу. Шагьалай МахIаммадова бур филолог, журналист. Зий бур «Дагъусттаннал пенсионер» кказитрай корреспондентну. Нурианна Къаллаева халкьуннан ххаллилсса ккарччал хIакин хIисаврайгу кIулну бур.

Шаннахъул ссятрай най диркI­сса концертрайн бувкIми лакку балайрдая щакъалиххавай бия. Шагьалай ва Нурианна сахIналийн балай чин бувктари, тIутIал кацIру чан къабаврийнугу исват хъанай бия тамашачитуран вай бусравсса ва ххирасса бушиву.

Вайннал концерт хъиннура хъунна дан бувкIун бия Дагъус­ттаннал лайкь хьусса жула машгьурсса ва цаймигу балайчитал: Карин Кьадинаев, Аьбдул Мурадов, Рашид Багатаев, Муъминат Юсупова, Марианна, Ульзана Макьсудова, Зумруд Мусиева. Концертрай мукунма гьур­тту хьунни цинявннан бусрав хьусса Дагъусттаннал эстрадалул хьхьичIунсса балайчиталгу – Кристина, Даниэл Гьарунов, Гульхалум ХIажиева ва Диляра.
Шиккува кIицI лаган, лакрал миллатрал культура хьхьичIуннай даву мурадрай хъунмасса захIмат бихьлай бур мудан жула балайчитурал чIарав бацIайсса, Дагъус­ттаннал филармониялул директорнал хъиривчу, уздансса лакку душ София Разуева. Ва концерт сакин даврил масъаларттугу ванил цила бакIрайн лавсун бия.