[dropcap]Ч[/dropcap]Iаящиял шяраваллил мина дуссар Гъу­мучату ухссавнил ва баргъбуккавал чулийннай 16 км. манзилданий, Ахъушиял райондалул дазуцIухсса аьрщарай,

ЩутIу-Зунттул ухнилу.

КутIасса справка

ЧIаящиял чIаххуврайсса щархъивну хIисав хъанахъиссар: Уручул, Му­ккур, Гьуйми, Шушими, КIундими.
Хъу-лухччинул ва ризкьи-кьинилул муданнасса давурттацIун ЧIаящиял арамтал лагайсса бивкIун бур хIалтIилухун кьатIу-шавгу. Миннал хьхьичIунми сянатруну диркIун дур къалайчишиву ва уссал усттаршиву. Маэшатрал хъирив хъунмурчIин лагайсса бивкIун бур Мичиххичнавун, АьсатIиннавун, Къабардин-Балкьарнавун ва Ростов шагьрулийн.

Коллективизация хьуну мукьах сакин дурну диркIун дур XVII партсъездрал цIанийсса колхоз.
1940-кусса шинал ЧIая­щиял шяраву диркIун дур 69 тIюва, микку яхъа­найгу ивкIун ур 300 инсан.
Хъун дяъвилул аьрай талай ивкIун ур 23 чув. Минная зана хьуну ур анжагъ 7. Дяъвилий гьур­тту хьуминнавасса махъа-махъма – ХIаммадов Ахха аьпалухьхьун лавгунни 2011-кусса шинал. Зунттава бизан буллали­сса ппурттуву колхозрал правлениялул председательнугу ивкIссар кIицI увсса Ахха.

[dropcap]Б[/dropcap]изан бувну махъ шяраву ливчIун бивкIссар бувагу ца къатта – мугу аьрая чулахъ хьуну увкIсса Магьдиев Султаннул (СютIал) къуш. Яла, махъ, тикку салкьи хьуну бивкIссар шанма-мукьва къатта цаймигу. Хъиннура махъсса чIумал, 90-ку шиннардий, буттал шяравалу чансса духьурчагу цIу дуккаврил ххуллий биялсса хIарачат бивхьу­ссар ДР-лул парламентрал председательнал хъиривчу, итххявхсса жяматийсса ишккакку, Абакар Аьлиев­лул. Мунал дур­ссия цIусса къатри, цIу буккан бувссия щарнил мизит, зузи дурссия фермернал хозяйство.

Зунттава арандалийн бивзун мукьах ТIюхчардал ва ЧIаящиял цачIуну сакин дурссар ца колхоз, Калининнул цIанийсса. Яла махъ му колхозрал гьанулий дурну диркIссар «Тухчарский» тIисса винсовхоз.
Цал ЦIуссалаккуйгу, утти цIусса миналийгу ТIюхчар тIисса цIанилу яхъанай буссар кIивагу жямат.