«Гьунардал дуниял» – Лаващавгу

«Гьунардал дуниял» – Лаващавгу

Жу хьхьичIвагу чивчуссия цайнува цивппа хьусса художниктурал дирхьусса суратирттая дурсса, «Мир талантов» цIанилусса, ца кIаная цамур кIанайн ласайсса выставкалия.

Му уттинингу дирссар республикалул районнайн ва шагьрурдайн. Ва ххуллух тIурча, му выставка хьу­н­ни Лаващиял райондалий.
Выставкалул сакиншинначину бур коммерческий дакъасса «Культуралул ирс» тIисса фонд. Выставка дуллалиссар АьФ-лул ва ДР-лул Культуралул министерствар­ттал чIарав бацIаврийну, «Культура» цIанилусса нацпроектрал лаг­рулий.

Ца кIаная цамур кIанайн ласласисса выставкартту хъанахъиссар ДР-лул Культуралул министерствалучIасса Республикалул Халкьуннал творчествалул къатлул дуллалисса даврил ца агьамсса бутIану.

Ва экспозициялий дур цайнува цува хьусса 20 художникнал дирхьусса 40 сурат. Сугъури Увайсовлун, ХIажи Сунгъуровлун, Светлана Аьлибекован, Рашид Садулаевлун, Басир Мирзоевлун, Камалуттин Хайбуллаевлун ва выставка хъана­хъиссар цалла дирхьусса суратру чIявусса инсантурал хьхьичIун дуккан дуллалисса цалчинсса давуну.

Выставка, чув дулларчагу, тIитIайссар шадлугърал тагьарданий. Мукунна ва ххуллух Лаващавгу. Выставка тIитIлатIисса ихтилат бунни райондалул культуралул отделданул начальник Халид МутIаллимовлул, Лаващиял райондалул депутатътурал мажлисрал председатель Юсуп Аьлибековлул ва м.ц..

Читайте также: