лахха-ликканмур ларсун занай бивкIссар
1999 шинал жула аьрщарайн ярагъуннищалсса террористал ххявхсса чIумал цинявппагу Дагъусттаннал халкь, ца хьуну, данди бавцIуссар душманнайн.
Дяъвилул иширттал чIалачIи бувссар жула халкьуннал хIал. Цаягу инсан къавхьухьунссар вай иширттая архну авцIусса, цащава шаймур буллай, хIала къаувхсса.
Милицанал зузалт, Аьрасатнал аьралитал ва ополчентал ярагъ кIунттихьну талай бивкIхьурча, личIи-личIисса фондру, жяматийсса организацияртту цащава шайсса кумагру буллай бивкIссар захIматсса тагьарданувун багьсса инсантуран.
А. Аьбдуллаева
Кьини дурксса чIумал бувсса кумаг ххишалану бусрав шайссар. Хъуннасса ва бусравсса даву дурссар та ппурттуву, «Дараччи» клубрал душругу лагма лаган бувну, жула Мариян Илиясовал. ДартIун арцу, цимилгу бивссар ва «Дараччилул» душру Света Шабановащал, Гулизар Султановащал, Халла Оьмариеващал, Рая Загълиеващал, Наргиз Бакриеващал аьрали госпитальданийсса щавурду дирминначIан.
Дяъвилул ишру нанисса ЦIуссалакрал ва Бущихъиял районнаясса, цала къатта-къуш кьабитан багьсса лихъачултрачIан дука-хIачIанмур, лахха-ликканмур ларсун занай бивкIссар вай. Бувссар арцуйнусса кумагругу. Та захIматсса чIумал мукъуйну, канийну вайннал бувсса кумагру хъинну бусрав хьуссар ва бучIи лявкъуссар чIявуссаннан.
Дяъвилул иширттал дакIнийн бувтссар халкьуннан жула къучагъсса тарих, личIи-личIисса дяъвирдай чувшиву ккаккан дурсса вирттал. Му чIумалли пикри хьусса жула цIанийсса виричу душ ПартIу ПатIимаясса спектакль бишингу. Ва хьуссар чIумул тIалавшиннану.
Гьай-гьай, пикри дузрайн буккан бан диялсса харжлугъгу аьркин дагьлай диркIссар. ТеатрданучIарив мукунсса каши къадиркIссар. Му масъалагу «Дараччи» клубрал цала бакIрайн лавсъссар. Янна-ярагъуннилгу, лахху-ликкулулгу, сахIналийсса суратиртталгу щаллушинна лавайсса даражалийсса хьуссар.
Пьеса бишаврихлу театр лайкь хьуссар ДР-лул ПаччахIлугърал премиялун.
— Цинявппагу хъами Марияннуха лавхьхьусса бивкIссания, дунияллий тачIав дяъвирду къахьунссия. Укунсса ниттихъал къаитабакьинссия цала арсру цивппа кунмасса инсантал оьрмурдацIа буллан, — увкуссар тани Расул ХIамзатовлул.
Марияннул дуллай бивкIсса ххаллилсса давуртту дяличIан къариртун щиривкIуну зий бур хIакьинусса кьинигу, «Дараччи» клуб Гульшан Хасаевал каялувшиндаралу, чялишсса гьурттушинна дуллай бур республикалий, хаснува лакрал шаннагу райондалий хъанахъисса мероприятиярттай.
Сентябрь зурул 14-нний ЦIуссалакрал райондалий хьунни Дагъусттаннал аьрщарайн ххявхсса террористурал кьюкьри ххит дурну 20 шин шаврин хас дурсса байран. Гикку гьуртту хьусса «Дараччи» фондрал делегациялул дирхьунни тIутIив дяъвилул иширттаву ливтIуминнал гьайкалдануцI.
