Лакрал райондалул бакIчи Юсуп МахIаммадовлучIа хьунни райондалун 90 шин шаврил юбилейрайнсса хIадуршиндарал ялув зузисса сакиншиндарал комитетрал батIаву. Муний ххал диргьунни шадлугърал программа.
Зулайхат Тахакьаева
Юсуп МахIаммадовлул бувсунни му кьини райондалийн бучIан тIий бушиву хъуни-хъунисса хъамал Аьрасатнал гьар кIани-кIанттая. Москавлия бучIан тIий бусса бур Аьрасатнал ПрезидентначIасса Дагъусттаннал вакил Жамалуттин ХIасановлул каялувшиндаралусса хъунмасса делегация, Дагъусттан Республикалул ХIукуматрал делегация, министерстварттал ва ведомстварттал каялувчитал.
Шадлугъру дайдишинтIий дур ЯтIул ламуя, Вихьливсса ххуллул асфальт бавкьусса бутIа тIитIаврия. Муния махъ хьун тIий дур Гъумук футболданул майдан ва Жагьилтурал парк тIитIлатIисса шадлугъру. Агьаммур байран хьун тIий дур Гъумучиял Оьллаарив.
Барча бавурттая, район хьхьичIуннай даврил цIаний захIмат бивхьусса инсантуран наградартту дулаврия махъ хьун тIий дур «Лезгинка» ансамбль, Дагъусттаннал ПаччахIлугърал филармониялул артистал ва ацIниясса районнаясса творчествалул коллективру гьурттусса хъуннасса концерт.
Хьун тIий бур дучри ххяххан баврил бяст-ччал, мунил завалул фонд сакин хьуну бур 200 азарда къурушрая. Муния махъ хьун тIий бур спортрал бяст-ччаллу.
Лакрал райондалул каялувчитал оьвтIий бур щалагу миллатрайн, шадлугъирттайгу, бяст-ччаллайгу гьурттушинна дан.
