Нитти-буттахъал кисрай – къия
ЦIусса дуккаврил шинал дайдихьулий, ВЦИОМ-рал дурсса хIасиллайн бувну, махъсса кIира шинал мутталий оьрчIру школарттайн

хIадур баву нитти-буттахъан кIилийну ххирану дацIлай дусса дур: 2017 шинал дянивну 13 азарда къуруш аьркин дагьлай духьурча, гьашину 27 азарда къуруш харж дуван багьлай бусса бур. ЧIяруми арцу школалийн лаххансса янналух дулун багьну бур. Экспертътурал хIасиллайн бувну, школданийсса набор 10 азарда къурушран дарцIуну дур, 1-ми классир­ттавун наниминнал тIутIах дулунсса арцу хIисав къадурну. Аьрасатнал чIявусса школарттай, «ТIутIал кIанттай – оьрчIру» тIисса акция баян бувну, тIутIах дулунсса арцу мушакъатсса оьрчIан кумагран харж дуван датIларчагу, тIутIалмур бизнесрайх кьини къадукканссия, Аьрасатнавун вай гьантрай 7,7 миллион доллардансса тIутIив дуркIун дусса дур, флористътурал маэшат къаоьккир тIий бур экспертътал.

Кьурандалул лу Аьламравун ласун най усса ур
Сентябрь зурул 25-нний аьламравун леххан хIадур хъанахъисса Аьрабусттаннаясса цалчинма космонавт Хаззаа Мансурил цащалва космосравун ласунтIий ур Кьурандалул лугу. Ва хIадур уллалисса центрданул хъунама МухIаммад Рашид Салим Маррил бувсунни космонавтнал, Кьурандалул лу бакъагу, билаятрал ттугъгу, Аьрабусттаннал щайхнал суратгу, Дубайрал паччахIнал лугу ласунтIишиву ва ми гьарзат яла, зана шайхту, музейрдаву хIурматрай ядуллантIишиву.

Антарктидалий цIусса нухру
ляркъуну дур
Антарктида уттигу аьлимтурал хъирив лавну лахьхьин бувар. Вай гьантрай Австралиянал аьлимтуран ляркъуну дур аьрщарал лув цимирагу километралул лахъишиврий­сса арулла тоннель – нухру. Гивусса температурагу 20 градус гъилишиврул дусса дур.

Дагъусттаннай дурсса самолёт гьаз хьуссар
ссавруннайн
Москавливсса МАКС- 2019 авиасалондалул лагрулий ссавруннайн гьаз хьуну дур Дагъусттаннай дурсса самолёт МАИ- 411. Ва ххал диргьуну дур летчик-испытатель Муслим ХIасановлул. Москавуллал авиациялул институт­рал ляхъан дурсса ва самолёт дурну дур Къизлардал элект­ромеханикалул заводрай.
ХIадур бувссар
П. Рамазановал