Сентябрь зурул 5-нний кIюрххицIунмай зяр-зяр тIисса телефондалул чIунил чантI учин увну ур милицанал прапорщик Аьли Къуркъиев. Ванайн даврийн оьвтIий бивкIун бур.

Увну ур Аьли Къуркъиев 1962 шинал ЦIуссалакрал райондалий ЦIуссалакрал шяраву. Виваллил иширттал органнаву зун ивкIун ур 1987 шинал. Зий ивкIун ур ЦIуссалакрал РОВД-лул ППС-рал милицану. 2000 шинал август зурул 24-нний къуллугърал бурж биттур буллай жан дуллуну дур.

Андриана Аьбдуллаева
Ивзун, цала машиналий авчуну ур райотделданийн. Амма райотделданучIан ияннин ва ацIан увну ур пулеметирттал ва автоматирттал балгусса боевиктурал. Миннал Аьли, ­уккан увну машиналува, увцуну лавгун бур. Ясир увсса милица ЗандакьлийхчIин Чачаннавун увцуну ур. Ясир бувми бавкьусса чIивисса къатлуву 20-ксса аьра­литалгу бивкIун бур. Миннавух захIматсса щавурду дирсса 2 десантникгу ивкIун ур. Цаннал бартка къадиркIун дур, гаманалгу ччаннай щавурду диркIун дур. Боевиктурахь даруртту, бинтру булара тIий, миннатру буллай, Аьлил миннан ххуйсса кумаг бувну бур. Вай гьарзат яла къачагътураща итххявхсса Аьлил цалва бувсун бур.
Цахъи махъ боевиктурал миккуна увцуну бувкIун бур пострай ясир агьсса Кьурбан АхIмадовгу (Вайннал хьунабакьаврия жу чивчуссия Кьурбаннуясса макьалалуву – А.А. «Илчи» №31. 9 август, лаж. 14).
Кьурбаннул бувсун бур ­Аьлихь «Телевышка» пострай­сса талатавурттая ва пост буручлай бивкIминнал бакIрачIан бувкIмуния.
— Вайннал на сагъну итаншиву къакIулли, инава шичча итххяххарча, ва ттул курткагу дула ттул кулпатрахьхьун, — увкуну, Кьурбаннул цайрасса ккуллардал ккутIру дурсса курткагу дуллуну дур Аьлихьхьун.
Октябрь зурул ахирданий Кьурбан увцуну лавгун бур, Аьли тIурча, шиккува ливчIун ур. Январь зуруй архнияту боевиктурал ккаккан бувну бур ­Аьлин цаламиннах луглай бувкIсса кIива хъамитайпа. Кьурбаннул кулпат Миясат ккаккайхту, ­Аьлин бувчIуну бур Кьурбан шавайн къаившиву, га боевиктурал ­аьщун ивзшиву.
Ряхва барз бувну бур ­Аьлил боевиктурал ясир увну. Ци-дунугу давуртту дан уккан ув­сса чIумал ххари шайсса ивкIун ур. Мукун чIун цахъи ччяни лагайсса диркIун дур. Ва хияллай икIайсса ивкIун ур цал бунугу цала арсру чIуен бувну ххира бан. Буруккинттарай ивкIун ур армиялий ивкIусса арснах­сса дягъу ликкан дурасса, утти цаламур буруккингу ялун биян нанисса дугьарасса ниттия. Пикрирдай ивкIун ур кулпатрая. Пикрирдал шану ххиен бувну, хьхьу уттара дайсса диркIун дур. Ча дакIнийн багьанссия ванан 6 зурува цува плендалува уккан­шиву.
Ишрив укун багьну бур. Та ппурттуву СаллатIнал нитти­хъал союз ва Ярагъуннил гужирдал каялувчитал боевиктурайн бувккун, икьрал дурну дур ясир багьсса саллатI мукунма­сса боевиктурах баххана бан. Мукун саллатIнал хъирив бувкIсса чIумал Аьлил кумаг бувсса десантниктурал тавакъю бувну бур цивппа буцин бувкIминнахь вагу макьаитари куну, бувсун бур ва милицанал зузала ушиву. ТалихIиндаран, саллатI буцин бувкIсса делегациялуву ла­ккучу ивкIун ур. Ганал Аьлихь цIухху-бусу бувну бур, яла мунал хIакъираву боевиктуращалгу ихтилат бувну бур. Боевиктурал Аьли тархъан анну диялсса арцу тIалав дурну дур. Шайнал шаймур дуллуну, рартIун дур ва тархъан ан­сса арцу. Ца гьантлува Аьли шавай увкIун ур. Та февраль зурул 10-сса кьини вайннал кулпатран тачIав хъама­къаритай.
Аьлигу, нинугу цаннайн ца хъямала багьсса куц ккавкминнал иттату макь най дия тIар.
Щин дакIнийн багьанссия ца шинава Аьли дунияллия гьан­ссар куну. Та кьинирив Аьли ккаккан, ва тархъан хьусса ххаришиву кIидачIин нех дирхьуну най бивкIун бур шяраваллил жямат, гъан-маччами.
МаркIачIан чIумал бувкIун бур Кьурбаннул кулпат Миясатгу. Аьлил бувсун бур Кьурбан ва цува хьунабавкьусса ва яла личIи хьусса куц. Хъювуссулгу бувккун, цила ялунгу та-дунугу укуннасса ххаришиву диянсса умудрай лавгун бур Миясат.
Амма Къуркъиевхъал кулпатрал ххаришивугу лахъи къаларгун дур. Ца нюжмардува Аьли цала даврийн увккун ур. 2000 шинал август зурул 24-нний телевышкалийсса пост ххал бан нанисса милицанал зузалт Ширвани Мурачуев, Кьурбан АхIмадов ва Аьли бусса машина дяъвилул чIумал боевиктурал дирхьуну диркIсса миналий пIякь увку­ссар. Аьли машина бачин бувну ивкIун ур, Ширвани мунал чIарав. Ми кIиягу бусса кIанай ливтIуну бур. Махъ бивкIсса Бадави Чаринов ва Кьурбан АхIмадов сагъну ливчIун бур. Аьпалул хьуну махъ Аьли Къуркъиевлун дуллуссар Къучагъшиврул орден. Ванал цIа дирзун ду­ссар ЦIуссалакрал шяраваллил кIичIираваллин.