Ххутрал шяраваллил жяматралгу, кIулминналгу хъинну къаччан бивкIун кьамул бунни хъунмур оьрмулий архсса Къазахъисттаннай зий ва ялапар хъанай ивкIсса, Увайсхъал Зиявуттиннул арс Мусаннип ахиратрал шаврил хавар.

Мусаннип тихва уччаврил сававгу хьуну дур ванал щарссагу тихра паракьат дурну душиву, душру, куявтал ва миннал оьрчIругу тихва ялапар хъанай бушиву.
Мусаннип увссар Ххутрал шяраву 1935 шинал. КIиккува 7 классгу къуртал бувну, нитти-буттащал лавгссар Къаза­хъисттаннал хъуншагьру Алма-Аталив. 1954 шинал бувккуссар Актюбинскаллал педучилище. Джуринскаллал райондалий­сса Родники тIисса поселокрай байбихьулул школалул учительная дайдирхьуссар Мусанниплул шиная-шинайн ларай хъана­хъисса педагогнал даву. 1957 шинал армиялия зана хьуну махъ Мусаннип зий ивкIссар Алма-Аталивсса 50-мур школалий математикалул учительну. Зий унува, заочнайну бувккуссар Алма-Аталив Абайл цIанийсса институтрал физикалул ва математикалул факультет.

1964 шинал Мусаннип ивтссар Алма-Аталлал 77-мур школалул завучну, ца шинаватугу – 17-мур школалул директорну. Ххюра шинавату му школа шагьрулий цалчин байбивхьуссар кабинетирттал кьяйдалий зун. Директор Увайсовлул хIарачатрайну му школалий сакин бувссар оьрчIан захIматрал ва бигьалагаврил лагерь. 1974 шинал ва цIанасса Жетысускаллал райондалул ОНО-рал хъунаману ивтссар. Мунал каялувшиву дуллалисса чIумал му райондалул кIулшиву дулаврил отдел лайкь хьуну бур КПСС-рал ЦК-лул, СССР-данул Министр­турал Советрал, ВЦСПС-рал ва ВЛКСМ-рал ЦК-лул занази ЯтIул ттугъ ласун!
1983 шинал Мусаннип ивтссар Алма-Аталлал муххал ххуллул дуккаврил идарарттал отделданул начальникну, цаннагу дуллуссар муххал ххуллул генерал-лейтенантнал цIа. Ванал мукунна хIалал дурссар «ХIурмат лавайсса муххал ххуллучи» тIисса лахъсса цIагу.
1989 шинал Мусаннип ув­чIуссар Алма-Аталлал халкьуннал образованиялул управлениялул начальникну. Му даврий зузиссаксса хIаллай республикалул хъун шагьрулий хьхьичIва-хьхьичI къазахнал мазрайсса 14 школа тIивтIуну бур (муниннин бивкIун бур так ца школа). Мукунма школалийн бухханнинсса оьрчIансса къазах маз лахьхьин буллалисса 60 школагу тIивтIуну бур. Шагьрулий зун бивкIун бур цIусса журалул школартту, гимназиярду ва лицейрду.
Мусаннип Увайсов пенсиялийн увкссар 1996 шинал. Вара шинал увчIуну ивкIссар Алма-Аталивсса Дагъусттаннал культуралул центрданул председательну. 2007 шинал тIурча, увчIуссар Къазахъисттаннайсса Дагъус­ттаннал культуралул центрдал ассо­циациялул председательну.
ЧIявуссалийла увчIуну ивкIссар Алма-Аталлал шагьрулул халкьуннал депутатътурал советравун. Мусанниплун дуллуссар «ЗахIматрал лишандалул» кIира орден, Къазахъи­с­ттаннал республикалул «Достык» («Дусшиву») тIисса орден. Ва ивкIссар Къазахнал халкьуннал дуккаврил отличник, СССР-данул просвещениялул отличник.
Ванал чирчуссар 30-ннияр ххишаласса давуртту. Ванал цала чичаврил гьунаргу, нитти-буттахъал мина, цува лявхъусса кIанттул аьзизшивугу чIалачIи дурссар «Лак ва нава» тIисса лу чивчуну. Му луттирал цайнма цукунсса асар биян бувссарив, му мяйжаннугу лакрал миллат­рал энциклопедия хъанахъишиврия «Илчи» кказитрайгу, журналлайгу чивчуну буссия.
Мусаннип Увайсовлул цIа чирчуну личIантIиссар Ххутрал жяматралгу, лакралгу тарихрал бусравсса ххуттай.
Гъаза Гъазаев,
Сулайман Мусаев,
Макьсуд Кущаев