Ризанал арс
Шихсаэдов Амри
Оьрмулул 92 шинаву аьпалухьхьун лавгунни Дагъусттаннал ва лазгиял миллатрал аслийсса арс, хъинну хъунасса аьлимчу,
тарихирттал элмурдал доктор, профессор, АьФ-лул ва ДР-лул элмурдал лайкьсса ишккакку Ризанал арс Шихсаэдов Амри.
А.Р. Шихсаэдов увну ур 1928-кусса шинал Дарбант шагьрулий, интеллигентътурал къушлий. Ванал ппу Риза Шихсаэдов ивкIссар Дагъусттаннал цIуллу-сагъшиву дуруччаврил цалчинсса наркомну. Му цувагу ивкIссар Дагъусттаннал цIанихсса муршидлул иширттал ва кIулшивурттал варис.
1945-кусса шинал, Кьасумккантуллал дянивмур даражалул школа бувккуну махъ, Амри увхссар дуклан Ленинградуллал паччахIлугърал университетрал Машрикьуллал факультетрайн ва къурталгу бувссар 1951-кусса шинал.
1954-ку шиная шинай, цала оьрмулул махъра-махъсса кьинилийн ияннин Амри Шихсаэдов зий ивкIссар Дагъусттаннал Мазрал ва литературалул институтраву.
1963-ку шинал ванал дурурччуссар кандидатнал диссертация, 1976-ку шинал – докторнал диссертация. Ванал кIунттила дунияллийн дуркссар 400-нния лирчусса элмийсса давуртту ва 25 монография.
Сайки 60 шинал мутталий Амри Шихсаэдов ивкIссар институтрал архиологиялул экспедициярттал каялувчину. Ванал хIарачатрайну, ялун личин бувссар аьраб мазрайсса ва Дагъусттаннал мазурдийсса цаннияр ца ххазинасса канихчичрурдал коллекцияртту ва эпиграфикалул гьайкаллу.
Элмулул ххуллий ва аьлимчунал дурмур хъунмасса кьадрулий ва кьиматрай дуссар. Дагъусттаннай дакъассагу, щалагу Аьрасатнавугу, мунил кьатIувгу. Ванал хIалалгу дурссар паччахIлугърал лагрулийсса наградартту ва премияртту.
Дунияллия гьарчагу, Амри Шихсаэдовлул цIа абадлий личIантIиссар ванал кьадиртсса элмийсса давурттаву, гъанцириннал, дустурал, кIулминнал дакIурдиву!
Цал бунагьирттал аьпа баннав, рухI бигьаний дишиннав!
Дустал, гьалмахтал,
уртакьтал
Нураттиннул душ
Исрапилова Майсарат
Ва зурул 29-нний мукьцIал лахълахъиссар Шахьуватусса захIматрал ветеран, ххаллилсса хъамитайпа, Нураттиннул душ Исрапилова Майсарат дунияллия лавгун.
Бувссар ва 1931 шинал Харьковрай, къалайчи-хIалтIухъаннал Нураттиннул ва Къандаева Мисидул кулпатраву. Ппу Нураттин граждан дяъвилул чIумал партизантурал кьюкьлул командирну ивкIун ур, та чIумалсса иширттавух чялишну гьуртту хьуну ур, нинугу ххал-ххалаххул даврил пагьму бусса бивкIун бур, ирсирай хъунмур душнийнгу бивну бур дарзинал гьунар. Майсарат чIавасса чIумалва, дяъвилул шиннардий, къанавртту дуклакиминнан дукра шахьлай бивкIун бур, та заманнул никирал агьлу кунма, цуппагу ччяни захIматрал ххуллийн бувккун бур.
Майсарат колхозрал бригадирнугу зий бивкIун бур. Балчаннуй зунттал ххуллурдайх шяраваллавун занай, шяраву ца бакъа бакъасса ттучандалул даххунугу, хъунмурнугу зий бивкIун бур. Оьрмулул 21 шинаву щар хьуну бур райондалий сийлисса инсаннан – учительну, парторгну, школалул директорну ва колхозрал председательну зий ивкIсса МухIуттиннун. Майсарат ванан щар шайни, ванал 8 шинавусса душгу бивкIун бур. Майсаратлул вагу, цилами ххюва оьрчIая личIи къабувну, цилва лякьлул душ кунма, тарбия бувну бур.
1964 шинал вайннал кулпат МахIачкъалалив бивзун бур, Майсарат консерварду дувай заводрайн зун бувххун бур. 44 шинаву щащарну ливчIсса ванил узданну чивун буккан бувну бур шама арсгу, кIива душгу. Майсаратлул ца душ, ПатIимат Бариева, пагьму-гьунар бусса журналистка бия, тамансса шиннардий зий буссия «Илчи» кказитрай, вамур душ, Дагъусттаннал халкьуннал шаэр Космина Исрапилова, литературалия ва журналистикалия хавар буминнан ххуйну кIулссар.
Майсарат бия захIмат ххирасса, дакI-аьмал хъинсса, дакI тIиртIусса, аьчухсса хъамитайпа, лагма-ялттуминнащал хIал бавкьусса хъамитайпа. Ванин хъинну ххирая буттал шяравалу ва шяраваллил жямат.
Ва дунияллия лагаврил кьурчIишиву кIидачIлай, жижара буллай буру ванил наслулухь, гъан-маччацириннахь.
Цил гьав нурданул дуцIиннав! Ванил чаннасса симан личIантIиссар ва кIулцириннал дакIурдиву.
Шахьуйннал жямат
ХIашиннул арс
Оьмаров МахIарам
Сентябрьданул 11-нний ахиратравун лавгунни ЧукIуннал шяравасса ххаллилсса зунтталчу, Гьашиннул ва Саратлул арс Оьмаров МахIарам.
Увссар МахIарам МахIачкъалалив 1963-ку шинал. 1980-ку шинал, 10 классгу къуртал бувну, лавгссар армиялийн. 1984-ку шинал морякнал формалуву зана хьуссар шавайн. Аьралий бурж лавхъун махъ захIматрал ххуллу байбивхьуссар троллейбусрал водительну зий.
Зий ивкIссар чIярусса шиннардий строительствалул давурттайгу. МахIарам ия цала даву ххирасса, инсаннал чIарав ацIан мудангу хьхьичIунсса, гьарцаннащал хIал бавкьусса чув-адамина.
Махъ ливчIунни ххирасса кулпатгу, аьзизсса арс ва душгу. МахIарамлул чIун дакъасса бивкIулул кьурчIишиву кIидачIлай, жижара буллай буру кулпат Зимфирахь, оьрчIахь, уссихь, ссухълуннахь, ниттил ссухълуннахь, ссурахъаврахь. Гьав нурданул дуцIиннав, алжаннул ххари аннав, махънал оьрмурдай барачат бишиннав.
ЧукIуннал
ва Ккуллал жямат
Ниттилссил
ххира оьрчI
Ниттилссил ххира оьрчI,
Ттул янил чаний,
Дунияллух мякьна,
Цан лакьав яру.
Лажинни, къавхьунав
Чансса яхI буван,
Вила ххирасса арс
Ялун учIаннин.
Вил хьунийн укканссар
Вил ххира бутта,
Хъямала дагьанссар
Аьзизсса нину.
Гьаксса вищал бия
Вил аьзиз кулпат,
Къавхьунна ххассал ан
Ина ванища.
ЛичIантIиссар абад
Вия ирсирай
Вил тIул-тIабиаьтрал
Уздансса аьпа.
Шанашу, ххирама,
Утти рахIатну,
АрхIалла хъин хьуну
ЦIуцIавурттугу.
Бахттун Гъазиева
